‘पुष्पा २’ अभिनेता अल्लु अर्जुन प्रहरी नियन्त्रणमा

इटहरी/ दक्षिण भारतीय सुपरस्टार अल्लू अर्जुनलाई हैदराबाद प्रहरीले ‘पुष्पा २: द रुल’को प्रिमियर शोमा भएको भागदौडको घटनाका कारण नियन्त्रणमा लिएको छ । डिसेम्बर ४ मा हैदराबादको सन्ध्या थिएटरमा आयोजित प्रिमियर शोमा अर्जुनको उपस्थिति रहने खबरले प्रशंसकहरूलाई अत्यन्त उत्साहित बनाएको थियो ।

तर, भीडको जोश अनियन्त्रित भएपछि भागदौड मच्चिएको थियो । यस घटनाका कारण ३५ वर्षीया रेवतीको निधन र उनका १३ वर्षीय छोरा श्री तेज गम्भीर घाइते भएका थिए । प्रहरीले घटना भएपछि अनुसन्धान अगाडि बढाएको छ । भीड नियन्त्रणमा चुक्न पुगेको भन्दै अल्लू अर्जुनलाई सोधपुछका लागि नियन्त्रणमा लिइएको हो ।

यो घटनाले ‘पुष्पा २: द रुल’को प्रचारलाई चर्चामा ल्याए पनि, स्टारको जिम्मेवारीप्रति प्रश्नचिन्ह खडा गरेको छ । अर्जुनले घटना प्रति दुख व्यक्त गर्दै घाइतेको उपचारका लागि २० लाख सहयोग गर्ने वाचा गरेका थिए । प्रशंसकको भीड व्यवस्थापन गर्न सुरक्षा उपाय प्रभावकारी नहुनु घटनाको मुख्य कारण मानिएको छ ।