बलिउड फिल्म ‘तेरे इश्क मेँ’को देशभर बुकिङ खुल्ला

एजेन्सी/ लामो समयको प्रतीक्षापछि बलिउडका चर्चित निर्देशक आनन्द एल. रायको बहुप्रतिक्षित फिल्म ‘तेरे इश्क मेँ’ भोलि शुक्रबार देखि नेपालसहित विश्वभर एकसाथ प्रदर्शनमा आउने भएको छ । ‘राञ्जना’ जस्तो कल्ट क्लासिक फिल्म पस्किएका निर्देशक राय र अभिनेता धनुषको तेस्रो सहकार्य भएकाले दर्शकमाझ यस फिल्मलाई लिएर ठूलो उत्साह देखिएको छ ।

शुक्रबारको रिलिजलाई लक्षित गर्दै नेपालका अधिकांश मल्टिप्लेक्स तथा सिंगल थिएटरहरूले आज बिहीबार देखि नै अग्रिम बुकिङ खुला गरेका छन् । काठमाण्डौका क्युएफएक्स, बिग मुभिज, वान सिनेमाज लगायतका प्रमुख हलहरूमा फिल्मका शोहरू सार्वजनिक भइसकेका छन् । वितरकहरूका अनुसार, बुकिङ खुल्नासाथ दर्शकको राम्रो प्रतिक्रिया देखिएको छ, जसले बक्स अफिसमा फिल्मको बलियो ओपनिङको संकेत गरेको छ ।

सन् २०१३ मा आएको सुपरहिट फिल्म ‘राञ्जना’ को संसारसँग मेल खाने तर बिल्कुलै फरक कथा बोकेको यस फिल्ममा अभिनेता धनुष र अभिनेत्री कृति सेनन मुख्य भूमिकामा छन् । निर्देशक रायका अनुसार, यो फिल्म प्रेमको मात्र नभई इर्श्या, पीडा र भावनात्मक द्वन्द्वको गहिरो कथा हो । फिल्मको संगीत ओस्कार विजेता ए.आर. रहमानले तयार पारेका छन्, जसका गीतहरू रिलिज पूर्व नै चर्चित भइसकेका छन् ।

@parikalanewsofficial

फिल्मलाई टी–सिरीज र कलर यलो प्रोडक्सनको ब्यानरमा भूषण कुमार, आनन्द एल. राय, हिमांशु शर्मा र कृशन कुमारले संयुक्त रूपमा निर्माण गरेका हुन् । यो फिल्म हिन्दीका साथै तमिल र तेलुगु भाषामा पनि रिलिज हुनेछ । यसअघि यही टिमले बनाएको ‘राञ्जना’ र ‘अतरंगी रे’ जस्ता फिल्महरूले समिक्षक र दर्शक दुवैको मन जितेका थिए । यस फिल्मले नेपालमा बलिउड फिल्मको बजारलाई पुनः तताउने अपेक्षा गरिएको छ । प्रेम र विछोडको कथा पस्कने यो फिल्मलाई दर्शकले कति रुचाउने छन्, त्यो भने शुक्रबारको पहिलो शो पछि नै थाहा हुनेछ ।