अष्ट्रेलियामा डिग्री गरेकी बिनिता फिल्म ‘पिआर’ मार्फत अभिनयमा डेब्यु गर्दै

इटहरी/ अष्ट्रेलियाको प्रतिष्ठित शैक्षिक संस्थाबाट उच्च शिक्षा हासिल गरेपछि धेरैजसो युवायुवतीको रोजाइ विदेशमै सेटल हुने वा कर्पोरेट जागिर खाने हुन्छ । तर, मोरङकी बिनिता कार्कीले भने अलिक फरक बाटो रोजिन् । ग्ल्यामर र कलाको मोहले उनलाई नेपाली फिल्म उद्योगमा तानेर ल्यायो । खोटाङमा जन्मिएर मोरङको पथरीशनिश्चरेमा हुर्किएकी २६ वर्षीया बिनिता यतिबेला फिल्म ‘पिआर’ मार्फत नेपाली फिल्म उद्योगमा दरिलो उपस्थिती जनाउने तरखरमा छिन् ।

२६ वर्षअघि खोटाङको पहाडी जिल्लामा जन्मिएकी बिनिताको बाल्यकाल र किशोरावस्था मोरङको पथरीमा बित्यो । उनले आफ्नो प्रारम्भिक शिक्षा पथरीकै ‘श्री केबी मेमोरियल अंग्रेजी बोर्डिङ स्कूल’ बाट पूरा गरिन् । विद्यालय तहपछि उच्च शिक्षाको खोजीमा काठमाडौं आएकी उनले ललितपुरको हात्तीवनस्थित ‘आईजे पायोनियर कलेज’ बाट प्लस–टु उत्तीर्ण गरिन् ।

त्यसपछिको उनको शैक्षिक यात्रा भने सात समुद्रपारि जोडियो । उच्च शिक्षाका लागि अष्ट्रेलिया पुगेकी उनले ‘न्यु एजुकेशन सिड्नी’ बाट स्नातक तह सफलतापूर्वक सम्पन्न गरिन् । यद्यपि, विदेशको डिग्री र सुखद जीवनशैलीले पनि उनभित्रको कलालाई मार्न सकेन । ५.७ फिट अग्लो कद र क्यामरा सुहाउँदो व्यक्तित्वकी धनी बिनिता सुरुवाती दिनमा मोडेलिङमार्फत दर्शकको नजरमा परिन् ।

@parikalanewsofficial

र्‍याम्प र फोटोसुटमा देखिएको उनको आत्मविश्वासले उनलाई ठूलो पर्दासम्म डोहोर्‍यायो । अन्ततः उनले फिल्म ‘पिआर’ मार्फत नेपाली फिल्म उद्योगमा डेब्यु गर्ने तयारीमा छिन् । पहिलो फिल्ममै उनले देखाएको गहकिलो अभिनयले उनी लामो रेसको घोडा बन्न सक्ने संकेत गरेको छ । पर्दामा ग्ल्यामरस देखिए पनि वास्तविक जीवनमा बिनिता अनुशासित र संस्कारयुक्त छिन् । हिन्दू परम्परामा हुर्किएकी उनी आधुनिक विचार र परम्परागत मूल्यमान्यताबीच सन्तुलन मिलाउन सिपालु छिन् । फुर्सदको समयमा उनी आफूलाई सिर्जनात्मक काममा व्यस्त राख्छिन् ।

नयाँ-नयाँ ठाउँको यात्रा गर्ने, भान्सामा विभिन्न परिकार पकाउने र सपिङ गर्ने उनको सोख हो । लक्ष्यप्रति केन्द्रित र मेहनती स्वभावकै कारण उनले छोटो समयमा आफ्नो बेग्लै पहिचान बनाउन सफल भएकी छिन् । शैक्षिक योग्यता र कलाको सुन्दर संयोजन बनेकी बिनिता कार्कीले फिल्म र मोडेलिङ दुवै क्षेत्रमा आफूलाई निरन्तर निखारिरहेकी छिन् । उनको यो लगनशीलताले भविष्यमा नेपाली दर्शकले एक सशक्त र प्रभावशाली अभिनेत्री पाउने निश्चितप्रायः छ ।