‘गर्ल नेक्स्ट डोर’को छवि बदल्दै वर्षा, ‘हर्ष’ले दिनेछ खुशीको आँसु

इटहरी/ नेपाली फिल्म क्षेत्रमा ‘नाइँ नभन्नू ल ४’ मार्फत पाइला टेकेकी अभिनेत्री वर्षा राउतले आफ्नो अभिनय यात्राको एक दशक पूरा गर्दैछिन् । प्राय: ‘गर्ल नेक्स्ट डोर’ र मल्टिस्टार फिल्मको भीडमा रमेकी वर्षा, यसपटक भने आफ्नो करियरको १०औँ वर्षमा आइपुग्दा नितान्त फरक र गम्भीर जिम्मेवारीका साथ दर्शकमाझ आउँदै छिन् ।

नव-निर्देशक एकता पौडेलको निर्देशनमा तयार भएको फिल्म ‘हर्ष’ मा वर्षा केन्द्रीय भूमिकामा देखिँदै छिन्, जहाँ उनले वंश परम्परा धान्नैपर्ने पुरातन सोचको चेपुवामा परेकी एक बुहारीको कथा व्यथालाई पर्दामा उतारेकी छिन् । विगतमा ‘ऐँचो पैँचो’ लगायतका फिल्मबाट अभिनयको प्रशंसा बटुलिसकेकी वर्षा यसपटक भने अलि बढी सचेत छिन् । सहायक वा साझा भूमिकाभन्दा माथि उठेर फिल्मको पूर्ण भार आफ्नो काँधमा आएपछि दर्शकको मूल्यांकन अझ कडा हुने उनको बुझाइ छ ।

“केन्द्रीय भूमिका भएपछि दर्शकले मेरो कामलाई अलि ध्यान दिएर हेर्नुहुन्छ । वर्षाले यसमा कत्तिको काम गरिन्, अघिल्ला फिल्मभन्दा कत्तिको सुधार गरिन् भनेर दर्शकले विचार गर्नुहुनेछ भन्ने अपेक्षा राखेकी छु,” वर्षाले भनिन् । विवाहित अभिनेत्री भएकाले वर्षालाई प्राय: अन्तर्वार्ताहरूमा सन्तान र परिवारको विषयमा सोधिने गरिन्छ । तर, ‘हर्ष’को पात्र आफ्नो वास्तविक जीवनभन्दा बिलकुलै फरक रहेको उनले स्पष्ट पारिन् । निर्देशकले खोजेको ‘इसेन्स’लाई समातेर आफूलाई पात्रमा ढालेको उनको भनाइ छ ।

@parikalanewsofficial

“मैले एउटा पात्र निर्वाह गरेकी हुँ । सन्तान हुँदा वा नहुँदा त्यो पात्रले कस्तो भोगाइ भोग्छ भन्ने कुरा फिल्ममा देखिन्छ, यसमा मेरो व्यक्तिगत जीवन मिसिएको छैन,” उनले प्रष्ट्याइन् । पछिल्लो समय बक्स अफिसमा पारिवारिक कथावस्तुमा आधारित फिल्मले राम्रो व्यापार गरिरहेका छन् । यही लहरमा आउन लागेको ‘हर्ष’ले दर्शकलाई निराश बनाउने आँसु नभई ‘खुशीको आँसु’ दिने वर्षाको दाबी छ ।

ट्रेलर हेरेर दर्शकले यसलाई केवल दुखान्त फिल्म ठानेको हुन सक्ने भन्दै उनले भनिन्, “यसले आँसु त झारिदिन्छ, तर हर्षका । हाम्रो फिल्मले हर्षित पार्दै रुवाउनेछ र दर्शकले आफ्नो परिवारसँग जोडिएको अनुभूति गर्नुहुनेछ ।” यस फिल्ममा वर्षाले अभिनेता/लेखक खगेन्द्र लामिछानेसँग जोडी बाँधेकी छिन् । लामिछाने र राउतको यो ‘फ्रेस जोडी’लाई दर्शकले रुचाउनेमा निर्माण पक्ष आशावादी देखिएको छ । पारिवारिक संवेदना बोकेको यो फिल्म यही मंसिर १२ गते देखि देशभर प्रदर्शनमा आउँदैछ ।