कुम्भको टिजरमा एक्सन, रोमान्स र रहस्य, जेठ १५ मा रिलिज हुने

इटहरी/ नेपाली फिल्म ‘कुम्भ’को अफिसियल टिजर सार्वजनिक भएको छ । यस फिल्मको टिजर रिलिजसँगै निर्माण पक्षले अफिसियल प्रदर्शन मिति पनि घोषणा गरेको छ । अब यो फिल्म आगामी जेठ १५ गतेदेखि देशभरका फिल्म हलहरूमा एकसाथ प्रदर्शनमा आउने भएको छ । सार्वजनिक टिजरले यतिबेला दर्शक र सम्पूर्ण फिल्म वृत्तमा चर्चा पाउन सुरु गरेको छ ।

टिजरमा समावेश उच्चस्तरीय एक्सन दृश्य, पावरफुल संवाद र रहस्यमय कथावस्तुले दर्शकको ध्यान खिचेको छ । मल्टी-स्टारर यस फिल्ममा अशोक आर्यन, सुनिल थापा, रोहित रुम्बा, सृष्टि, सुशील र रोबर्ट लगायतका कलाकारहरूको अभिनय देख्न सकिन्छ । विशेषगरी, सदाबहार अभिनेता सुनिल थापाको अवतार र भूमिका टिजरमा निकै प्रभावशाली देखिएको भन्दै सामाजिक सञ्जालमा उत्कृष्ट प्रतिक्रियाहरू आइरहेका छन् । हेर्नुस् टिजर ।

निर्माण टिमले ‘कुम्भ’लाई नेपाली फिल्मको परम्परागत शैलीभन्दा माथि उठेर नितान्त नयाँपन र उच्च प्राविधिक स्तरमा प्रस्तुत गर्ने लक्ष्य राखेको दाबी गरेको छ । रणधीर श्रेष्ठको लेखन तथा निर्देशन रहेको फिल्ममा उनै श्रेष्ठले छायांकन तथा सम्पादन समेत गरेका छन् । ईश्वर बल्लभ उप्रेती कार्यकारी निर्माता रहेको फिल्मको निर्मातामा रणधीर श्रेष्ठ र राजेश शाह रहेका छन् । यो फिल्मलाई सुनिल मानन्धरको श्रीराम बालाजी फिल्मस्ले देशभर वितरणको जिम्मा लिएको छ ।