इटहरी/ नवविवाहित जोडीको रूपमा अभिनेता विपीन कार्की र अभिनेत्री केकी अधिकारीको आकर्षक केमेस्ट्री प्रस्तुत गर्दै आगामी फिल्म ‘काजी’को पहिलो गीत सार्वजनिक भएको छ । बिहीबार काठमाण्डौमा आयोजित एक विशेष कार्यक्रमका बीच निर्माण टोलीले फिल्मको कथासार बुझाउने ‘वारि बर पारि पीपलु’ बोलको गीत रिलिज गरेको हो ।
चर्चित संगीतकार कालीप्रसाद बास्कोटाको शब्द र संगीत रहेको यस गीतमा नेपाल आइडलका दुई विजेताहरू करण परियार र गंगा सोनामले स्वर दिएका छन् । यसै गीत मार्फत गायिका गंगा सोनामले नेपाली फिल्मको पार्श्व गायनमा आफ्नो शानदार डेब्यु गरेकी छन् । गीतले रिलिजसँगै दर्शकहरूमा फिल्मप्रति उत्सुकता बढाएको छ । कविराज गहतराजको उत्कृष्ट कोरियोग्राफी रहेको यस गीतको भिडियोले श्रीमान्-श्रीमतीबीचको गाढा प्रेमकथा देखाउँछ । हेर्नुस् भिडियो ।
भिडियोमा विपीन र केकीलाई गाउँले नवविवाहित दम्पतीको रूपमा देखाइएको छ, जहाँ उनीहरूको प्रेमिल दैनिकी, बिहानको पूजापाठदेखि लिएर खेतबारीमा सँगै काम गरेको दृश्यलाई निकै कलात्मक ढंगले समेटिएको छ । लक्ष्मण रिजालको निर्देशनमा तयार भएको यो फिल्म आगामी जेठ ८ गतेदेखि देशभर प्रदर्शनमा आउँदैछ । निर्माण पक्षका अनुसार ‘काजी’ विशुद्ध एक भावनात्मक र सामाजिक कथामा आधारित फिल्म हो ।
यसले मानवीय सम्बन्ध, माया, पारिवारिक पीडा र जिम्मेवारीका विभिन्न गहिरा पाटाहरूलाई पर्दामा उतार्ने प्रयास गरेको छ । रिजाल एन्ड रिजाल प्रोडक्सनको ब्यानरमा निर्माण भएको यस फिल्मका प्रस्तुतकर्ता रामप्रसाद रिजाल हुन् । फिल्ममा मुख्य कलाकारको रुपमा विपीन कार्की, केकी अधिकारी, गरिमा शर्मा, हेमन्त बुढाथोकी, प्रकाश घिमिरे, विशाल पहारी, हिउँवाला गौतम, अनुराग कुँवर, सन्दीप बाबु लोहानी, विनोद न्यौपाने, रश्मि भट्ट, प्रीतिका शर्मा, प्रशंसा सुवेदी र नवराज गिरीले अभिनय गरेका छन् ।
@parikalanewsofficial
यस्तै बाल कलाकार दिक्षिता अर्याल, आरव बराल र सुपला सापकोटाको पनि अभिनय देख्न सकिन्छ । फिल्मको लेखन प्रदीप भारद्वाजले गरेका हुन् भने छायांकन चिन्तन राजभण्डारीको रहेको छ । सम्पादन विपीन मल्ल, सम्पादन सुपरभाइजर बनिश शाह रहेका छन् । फिल्मको कार्यकारी निर्माता असिम काफ्ले हुन् भने निर्माताको रूपमा रामप्रसाद रिजाल, नेहान रिजाल र विकास राज जोशी रहेका छन् ।
Discussion about this post