हलमा चिप्लिएको ‘रावायण’ युट्युबमा हिट, तर पलको नक्कली दाह्रीको उस्तै चर्चा

इटहरी/ अभिनेता पल शाह र अभिनेत्री पूजा शर्मा अभिनित एक्सन जनराको फिल्म ‘रावायण’ यतिबेला युट्युबमा चर्चाको विषय बनेको छ । हल रिलिजको करिब डेढ वर्षपछि डिजिटल प्लेटफर्ममा सार्वजनिक भएको यस फिल्मले सुरुवाती दिनमै बम्पर भ्युज पाएको छ । युट्युबमा रिलिज भएको जम्मा ३ दिन पुग्नै लाग्दा फिल्मले १४ लाखभन्दा बढी भ्युज बटुलिसकेको छ ।

यद्यपि, फिल्मले पाएको भ्युजसँगै यसका मुख्य अभिनेता पल शाहको ‘नक्कली दाह्री र जुँगा’को बहस फेरि एकपटक चर्चामा आएको छ । स्मरण रहोस्, डेढ वर्षअघि फिल्म हलमा प्रदर्शन हुँदा पनि पल शाहको गेटअपले निकै आलोचना खेपेको थियो । उनको अस्वभाविक देखिने नक्कली दाह्री र जुँगाकै कारण दर्शक भड्किएको र सोही कारण फिल्मको बक्स अफिस कलेक्सन डामाडोल भई फिल्म चिप्लिएको विश्लेषण त्यतिबेला गरिएको थियो ।

@parikalanewsofficial

अहिले युट्युबमा फिल्म हेरिरहेका दर्शकहरूले पनि कमेन्ट बक्समा उही पुरानो कुरा दोहोर्‍याइरहेका छन् । दर्शकहरूले अझै पनि पलको मेकअप र दाह्रीलाई लिएर व्यंग्य गर्न छाडेका छैनन् । तर, एउटा रोचक पक्ष के छ भने, हलमा बक्स अफिसको लडाइँ हारेको यो फिल्मले युट्युबमा भने दर्शकको राम्रो साथ पाइरहेको छ ।

दाह्रीको आलोचना गर्नेहरू एकातिर भए पनि, फिल्मको कथा र प्रस्तुतिलाई रुचाउँदै सकारात्मक कमेन्ट गर्नेहरूको लहर पनि निकै लामो छ । यसले के देखाउँछ भने, कलाकारको सामान्य मेकअप र गेटअपमा हुने कमजोरीलाई दर्शकले लामो समयसम्म नबिर्सिए पनि, फिल्मलाई डिजिटल प्लेटफर्मका दर्शकले भने एउटा मौका दिएका छन् ।