करुणाको जन्मदिनको माहौलमा ‘ज्यू ज्यू सोल्टी’ भन्दै महानायकसँग रोमान्स

इटहरी/ एकातिर आफ्नो जन्मदिनको विशेष अवसर, अर्कोतिर नेपाली फिल्मका महानायकसँगको नयाँ सांगीतिक कोसेलीको सार्वजनिक । गायिका तथा मोडल करुना राईको लागि यसपटकको जन्मदिन दोहोरो खुसी बोकेर आयो । काठमाडौंमा आयोजित एक विशेष कार्यक्रमका बीच करुनाले महानायक राजेश हमालसँग रोमान्टिक अवतारमा देखिएको नयाँ पूर्वेली भाकाको गीत ‘ज्यू ज्यू सोल्टी’ दर्शकमाझ ल्याएकी छन् ।

पूर्वेली शैलीको यस डान्सिङ नम्बरमा महानायक राजेश हमाल र करुना राईको जोडी निकै खुलेको छ । कार्यक्रममा आफ्नो अनुभव साट्दै करुनाले भनिन्, “महानायकजस्तो व्यक्तित्वसँग भिडियोमा सहकार्य गर्न पाउनु मेरो लागि ठूलो भाग्यको कुरा हो । उहाँसँग यो मेरो पाँचौँ काम हो र हरेक पटक मैले धेरै कुरा सिक्ने अवसर पाएकी छु ।” हेर्नुस् भिडियो ।

विशेष अतिथिका रूपमा उपस्थित भएका सदाबहार नायक धिरेन शाक्यले पनि पर्दामा हमाल र राईको जोडी उत्कृष्ट देखिएको भन्दै भिडियोको खुलेर तारिफ गरे । साथै, उनले करुनालाई जन्मदिन र नयाँ गीत दुवैको लागि शुभकामना दिए । सोही कार्यक्रममा बोल्दै महानायक राजेश हमालले कलाकारिताका विविध आयामबारे आफ्नो धारणा राखे ।

म्युजिक भिडियो र फिल्म दुवै कलाकै महत्त्वपूर्ण विधा भएको औंल्याउँदै उनले भने, “एउटा सच्चा कलाकारले कुनै एउटा घेरामा मात्र सीमित नभई हरेक प्रकारका काम र भूमिकामा आफूलाई खरो उतार्न सक्नुपर्छ ।”

@parikalanewsofficial

सार्वजनिक गीतमा करुणा राईसँग राजकुमार बगरको युगल स्वर सुन्न सकिन्छ । गीतमा शब्द हरि सापकोटा, संगीत शंकर बराइली, निर्देशन तथा कोरियोग्राफी देवेन्द्र पाण्डे, छायांकन रामकृष्ण चौलागाईं, सम्पादन विकास दाहालको रहेको छ । जन्मदिनको केक काटेर उल्लासमय वातावरणमा सार्वजनिक गरिएको यो भिडियोले दर्शक तथा स्रोतालाई भरपुर मनोरञ्जन दिने निर्माण पक्षको विश्वास छ ।