‘अक्षरा’को प्रमुख भूमिकामा सुशील र न्यान्सी, शुभ मुहूर्त गर्दै छायांकन सुरु

इटहरी/ नेपाली फिल्म क्षेत्रमा नयाँ कथा र फरक प्रस्तुति पस्कने जमर्कोसहित फिल्म ‘अक्षरा’को निर्माण घोषणा भएको छ । निर्देशक विनयराज पौडेलको निर्देशनमा तयार हुन लागेको यस फिल्मले शुक्रबार बिहान गुहेश्वरी मन्दिरको पावन भूमिमा स्क्रिप्ट पूजा गर्दै औपचारिक रूपमा फिल्मको छायांकन यात्रा सुरु भएको छ । क्षित बाबू प्रोडक्सन हाउसको ब्यानरमा बन्न लागेको यस फिल्मले अनुभवी प्राविधिक र जम्बो कलाकारहरूको टोलीलाई एकै ठाउँमा उभ्याएको छ ।

फिल्ममा अभिनेता सुशील सिटौला र अभिनेत्री न्यान्सी खड्काको मुख्य भूमिका रहनेछ । उनीहरूलाई नेपाली फिल्म क्षेत्रका थुप्रै परिचित अनुहारहरूले साथ दिनेछन् । फिल्ममा सिटौला र खड्काको साथमा शुशिल पोखरेल, पुष्कर राउत, रिस्ता अधिकारी, अंशु महर्जन, गीता अधिकारी, वीरेन्द्र कुशवाह र सृजना अधिकारी लगायतको अभिनय रहने छ ।

यस्तै बालकलाकारको रुमपा रोनक खड्का र प्रीसा ढुंगाना रहनेछन् । कुनै पनि फिल्मलाई उत्कृष्ट बनाउन क्यामेरा पछाडिको टिमको ठूलो हात हुन्छ । ‘अक्षरा’लाई हरेक कोणबाट सशक्त बनाउन पटकथा तथा संवादको काम लेखक अभिमन्यु निरवीले गरेका छन् । उग्रसेन ढुंगाना र सुग्रसेन ढुंगानाले फिल्ममा लगानी गर्दैछन् भने कार्यकारी निर्माताको रुपमा सुरज थापाकाजी रहेका छन् ।

@parikalanewsofficial

फिल्मको सांगीतिक पक्षलाई कर्णराज गिरीको संगीत र सुरेन्द्र रानाको शब्दले सजाउनेछ । रामजी लामिछानेको कोरियोग्राफी र शङ्कर महर्जनको एक्सन यो फिल्ममा रहनेछ । फिल्मको सुटिङ सुरु भएसँगै यसको प्रदर्शनको रोडम्याप पनि तय भइसकेको छ । निर्माण सम्पन्न भएपछि यस फिल्मलाई नेशनल सिने ग्रुप नेपाल प्रा.लि. मार्फत वितरक दीपक दंगालले देशभरका फिल्म हलहरूमा वितरण गर्नेछन् ।