हामीले एक-अर्कामा प्रेम भेट्टायौँ, मेरो खुसीको मजाक नउडाऊ – साम्राज्ञी

इटहरी/ चर्चित अभिनेत्री साम्राज्ञी राज्यलक्ष्मी शाहले आफ्नो जन्मदिनको अवसर पारेर केही दिनअघि इन्गेजमेन्टको घोषणा गरिन्, तर खुसीको यो खबर चरम उत्कर्षमा पुग्दैसँगै उनी विवादमा पनि तानिएकी छन् । सामाजिक सञ्जालमा उनको हुनेवाला श्रीमान् पहिले नै विवाहित रहेको र उनले “घर बिगार्न लागेको” भन्ने आरोपहरू लाग्न थालेपछि अभिनेत्री शाहले कडा स्पष्टीकरण दिएकी छन् ।

गत नोभेम्बर १८ (मंसिर ३) मा आफ्नो जन्मदिन मनाउँदै गर्दा साम्राज्ञीले इन्स्टाग्राम मार्फत आफू “औपचारिक रूपमा इन्गेज” भएको जानकारी दिइन् । उनले हिराको औंठी लगाएको तस्बिर र भावुक क्याप्सन सेयर गर्दै आफ्नो प्रेम व्यक्त गरेकी थिइन् । यद्यपि, उनले आफ्ना हुनेवाला पतिको नाम र स्पष्ट परिचय खुलाएकी थिइनन् । उनले ह्याशट्यागमा #SandB प्रयोग गरेकी थिइन्, जसले गर्दा फ्यानहरूले उनको प्रेमीको नाम ‘B’ बाट सुरु हुने अनुमान गरिरहेका थिए ।

तर, केही सममै उनको हुनेवाला श्रीमान विशाल खरेल रहेको खुलेको थियो । उनको नाम खुलेसँगै कन्टोभर्सी सुरु भएको हो । ‘प्रेम दिवस’बाट फिल्ममा डेब्यु गरेका विशालले साम्राज्ञीसँग ‘हारेँ हारेँ’ र ‘मालती’ गीतका भिडियोमा अभिनय समेत गरेका छन् । यही गीतमा काम गर्ने क्रममा उनीहरू एकअर्कासँग नजिकिएका थिए ।

इन्गेजमेन्टको तस्बिर सार्वजनिक भएलगत्तै सामाजिक सञ्जालका केही पेज र कमेन्टहरूमा साम्राज्ञीका हुनेवाला श्रीमान “विवाहित पुरुष” भएको र उनको विगतमा सम्बन्धविच्छेद वा परिवार रहेको दाबी गरियो । कतिपयले साम्राज्ञीलाई “अर्काको घर बिगार्ने”को संज्ञा दिँदै आलोचना गर्न थाले । यी आरोपहरूले उनको खुसीको माहोललाई तनावपूर्ण बनाएको छ ।

यिनै आरोप र नकारात्मक टिप्पणीहरूको जवाफ दिँदै साम्राज्ञीले एक इन्स्टाग्राम स्टोरी मार्फत आफ्नो मौनता तोडेकी छन् । उनले आफ्नो हुनेवाला श्रीमानको विगत रहेको स्वीकार्दै, उनी त्यो सम्बन्धबाट पहिले नै मुक्त भइसकेको प्रस्ट पारेकी छन् ।

उनले, “जब हामीले आशा गुमाएका थियौँ, हामीले एक-अर्कामा प्रेम भेट्टायौँ। दुर्भाग्यवश हाम्रो दुवैको विगत थियो, र यो सबैसँग हुन्छ, र हामीलाई यसमा कुनै पछुतो छैन । हामीले जीवनमा अघि बढ्ने निर्णय गर्यौँ । म कहिल्यै पनि विवाहित पुरुषसँग डेट वा इन्गेजमेन्ट गरेर कसैको परिवार भाँड्ने थिइनँ, उहाँ विगतबाट पहिले नै अघि बढिसक्नु भएको थियो । हाम्रो इन्गेजमेन्ट टिकाटालो भइसकेको छ र कानुनी रूपमा मंगेतरका रूपमा दर्ता भएका छौँ । हामी यसलाई सुरक्षित राख्ने, हाम्रो प्रेमको रक्षा गर्ने र खुसी हुने वाचा गर्छौँ, अनि कुनै पनि कुराले हामीलाई परिवर्तन गर्ने छैन । कसैको बारेमा धारणा बनाउनु (Judge गर्नु) अघि, कृपया याद गर्नुहोस् कि सिक्काका दुई पाटा हुन्छन्, त्यसैले मेरो खुसीको मजाक उडाउन बन्द गर्नुहोस् । कृपया भ्युज र लाइक्सका लागि मेरो नाम प्रयोग गर्न बन्द गर्नुहोस् र मलाई शान्तिसँग बाँच्न दिनुहोस् ।” लेखेकी छन् ।