विपिन र केकीको ‘क्लासिक लभस्टोरी’ फिल्म ‘काजी’ जेठ ८ गते रिलिज हुने

इटहरी/ विवाहपछिको सुन्दर प्रेमकथालाई पर्दामा उतारेको नयाँ फिल्म ‘काजी’ को प्रदर्शन मिति तय भएको छ । आइतबार एक आकर्षक ‘प्रिभ्यु’ सार्वजनिक गर्दै निर्माण पक्षले यो फिल्म आगामी जेठ ८ गतेदेखि देशभरका हलमा प्रदर्शन गरिने घोषणा गरेको हो । अभिनेता विपिन कार्की र अभिनेत्री केकी अधिकारीको मुख्य भूमिका रहेको यस फिल्मलाई महाकवि लक्ष्मीप्रसाद देवकोटाको अमर कृति ‘मुनामदन’ जस्तै उत्कृष्ट र ‘क्लासिक लभस्टोरी’ को रूपमा दाबी गरिएको छ ।

फिल्ममा विपिन ‘काजी’ को भूमिकामा देखिनेछन् भने केकीलाई दर्शकले ‘कजिनी’ को रूपमा पाउनेछन् । सार्वजनिक प्रिभ्युमा देखिएको फिल्मको ग्रान्ड मेकिङ र जबर्जस्त संवादले दर्शकमा कौतूहल र उत्साह जगाउन सफल भएको छ । यस प्रोजेक्टलाई लिएर अभिनेता विपिन कार्की निकै उत्साहित देखिएका छन् । हालै एक प्रिमियर शोका क्रममा मिडियासँग कुरा गर्दै उनले भनेका थिए, “काजी एउटा विशुद्ध र क्लासिक प्रेमकथा हो । मेरो अघिल्लो फिल्मले जस्तै यसले पनि दर्शकलाई सुखद सरप्राइज दिनेछ भन्नेमा म पूर्ण विश्वस्त छु ।” हेर्नुस् भिडियो ।

रामप्रसाद रिजालको प्रस्तुति रहेको यस फिल्ममा विपिन र केकीका अलावा नेपाली फिल्म क्षेत्रका चलेका अनुहारहरूको जमघट छ । फिल्ममा गरिमा शर्मा, प्रकाश घिमिरे, हेमन्त बुढाथोकी, विशाल पहारी, विनोद न्यौपाने, रश्मी भट्ट र हिउँवाला गौतमलगायतका कलाकारहरूको प्रमुख भूमिकामा अभिनय रहेको छ । यसैगरी, सन्दिपबाबु लोहनी, रोजी श्रेष्ठ, गंगा शर्मा, नवराज गिरि, बुद्धी सागर खनाल, प्रशंसा सुवेदी, कृतिका शर्मा र बाल कलाकार दिक्षिता अर्यालको पनि अभिनय देख्न सकिन्छ ।

@parikalanewsofficial

रिजाल एण्ड रिजाल प्रोडक्सनको ब्यानरमा निर्माण भएको यस फिल्मको निर्देशन लक्ष्मण रिजालले गरेका हुन् । फिल्मका लेखन प्रदीप भारद्वाज हुन् भने छायांकन चिन्तन राजभण्डारी, संगीत कालिप्रसाद बास्कोटा, पार्श्व संगीत सुजिल कर्माचार्यले गरेका छन् । यस्तै फिल्ममा सम्पादन बिपिन मल्ल, नृत्य निर्देशन कविराज गहतराज, प्रोडक्सन डिजाइन ओजस्वी ओझा, रंग संयोजक श्याम कुँवर र लोकेशन ध्वनी सागर अर्यालको रहेको छ ।

फिल्मको कार्यकारी निर्मातामा असिम काफ्ले रहेका छन् भने निर्माताको रूपमा नेहान रिजाल र विकाश राज जोशी जोडिएका छन् । त्यसैगरी, क्रिएटिभ हेडको जिम्मेवारी रोनाल्ड श्रेष्ठले र प्रोडक्सन हेडको जिम्मेवारी प्रकाश हमालले सम्हालेका छन् । पूर्ण रूपमा तयार भइसकेको यो फिल्मलाई श्रीराम बालाजी फिल्मस्‌ले नेपालभर वितरण गर्ने जिम्मा लिएको छ ।