सलिनमानकाे गर्धनमा ट्याटु र हातमा चुरोट, ७ वर्षपछि ‘ग्याङस्टर’ लुक्समा देखिए

इटहरी/ हातमा चुरोट, मदिराको गिलास अनि गर्धनभरि खोपिएका ट्याटु ! कुनै बेलाका ‘लभर ब्वाइ’ तथा ‘चकलेटी हिरो’ सलिनमान बनियाँको यो ‘रफ एन्ड टफ’ अवतारले यतिबेला नेपाली फिल्मी वृत्तमा जबर्जस्त तरंग ल्याइदिएको छ । करिब ७ वर्षदेखि पर्दाबाट पूर्ण रूपमा गायब भएका सलिनले नयाँ वर्षको छेको पारेर दिएको यो ‘हिन्ट’ले उनको धमाकेदार कमब्याकको पुष्टि मात्र गरेको छैन, उनको बदलिएको भूमिकाको पनि संकेत दिएको छ ।

‘ए मेरो हजुर २’ बाट नेपाली फिल्म क्षेत्रमा पाइला टेक्दा सलिनको लुक्स, ड्रेसअप र हेयर स्टाइलले युवापुस्तामा गजबको जादु चलाएको थियो । अभिनयमा केही कच्चापन देखिए पनि उनको स्टारडम यति लोभलाग्दो थियो कि, निर्माताहरू उनलाई एउटै फिल्मका लागि २५ देखि ३० लाख रुपैयाँसम्म पारिश्रमिक तिर्न लाइनमा हुन्थे ।

तर, ठूलो आशा गरिएको दोस्रो फिल्म ‘यात्रा: अ म्यूजिकल भ्लग’ बक्स अफिसमा चिप्लिएपछि उनी एकाएक मौन बसे । यो ७ वर्षको अन्तरालमा उनलाई दर्जनौं फिल्मका अफर नआएका होइनन्, तर चित्तबुझ्दो कथा र चरित्र नपाउँदा उनी पर्दामा फर्किन मानेनन् । लामो समयको मौनता तोड्दै मंगलबार सलिनले आफ्ना फ्यानहरूलाई ठूलो सरप्राइज दिए ।

@parikalanewsofficial

सामाजिक सञ्जालमा अर्थपूर्ण क्याप्सनसहितको नयाँ लुक्स सार्वजनिक गर्दै उनले लेखेका छन्, “कहिलेकाहीँ दूरी अन्त्य होइन, तयारी हुन्छ । केही समयको पर्खाइपछि… नयाँ वर्षले केही पुराना रंगहरू फेरि जिउँदो पार्न खोज्दैछ ।” उनको यो भनाइ र स्टाइलिस ग्याङस्टरको हुलिया हेर्दा, उनी अब पुरानो रोमान्टिक हिरोको घेरा तोडेर ‘एक्सन र डार्क’ अवतारमा उत्रिन लागेको प्रस्ट अनुमान गर्न सकिन्छ ।

सलिनको यो खतरनाक लुक्स कुन फिल्मका लागि हो भन्ने आधिकारिक घोषणा त भइसकेको छैन, तर फिल्मनगरीमा यसलाई ‘युनिभर्सिटी अफ गुण्डाज्’ सँग जोडेर हेरिएको छ ।
२०८० सालमै अभिनेता सलोन बस्नेतको निर्माणमा सलिनले यसै फिल्मबाट कमब्याक गर्न लागेको खबर बाहिरिएको थियो । विश्वस्त स्रोतका अनुसार, नयाँ फिल्ममा सलिन र सलोनबीचको सहकार्य पक्कापक्की जस्तै छ र यो ग्याङस्टर अवतार त्यही प्रोजेक्टको हिस्सा हुन सक्छ । ७ वर्षअघि जसरी सलिनको स्टाइलले दर्शकको मन जितेको थियो, अब उनको यो नयाँ र आक्रामक अवतारले बक्स अफिसमा कस्तो तहल्का मच्चाउनेछ ? त्यो भने हेर्न निकै रोचक हुनेछ ।