इटहरी/ लगानी र निर्माणको पाटोबाट नेपाली फिल्ममा ऐतिहासिक सफलता चाखिसकेका विनोद पौडेलले अब आफ्नो बाटो अझै फराकिलो बनाउने तयारी थालेका छन् । सर्वाधिक कमाइ गर्ने फिल्म ‘पूर्ण बहादुरको सारङ्गी’का यी सफल निर्माता अब क्यामेरा पछाडिको मुख्य कमान्ड सम्हाल्दै निर्देशनमा डेब्यु गर्न लागेका हुन् । नयाँ वर्षको अवसर पारेर उनले आफ्नो पहिलो निर्देशकीय फिल्म ‘दुई किनारा’को औपचारिक घोषणा गरेका छन् ।
सार्वजनिक गरिएको फिल्मको टाइटल पोस्टरले निकै गहिरो दार्शनिक अर्थ बोकेको छ । पोस्टरमा पहाडका दुई विपरित पाटाहरूलाई कलात्मक ढङ्गले प्रस्तुत गरिएको छ । एउटा पाटो हराभरा र लोभलाग्दो वनजंगल र अर्को पाटो उजाड, सुक्खा र उराठलाग्दो भिर । यी दुई विपरित ‘किनारा’ को बीचबाट अघि बढेको नागबेली गोरेटोले मानिसको जीवनका सुख र दुःखका घुम्तीहरूलाई संकेत गर्छ ।
निर्माण पक्षका अनुसार, जीवनका साना-साना निर्णयहरूले कसरी भविष्यमा ठूलो प्रभाव पार्छन् भन्ने मनोवैज्ञानिक कथा नै यस फिल्मको मुख्य मर्म हुनेछ । पौडेलको यो फिल्म हेर्न दर्शकले भने केही समय प्रतीक्षा गर्नुपर्नेछ । निर्माण टिमले फिल्मको प्रदर्शन मिति २०८४ साल वैशाख १ गते नयाँ वर्षलाई तोकेको छ । यद्यपि, फिल्मको कथावस्तुको थिम बाहिर ल्याइए पनि यसमा कुन-कुन कलाकारले अभिनय गर्दैछन् र प्राविधिक टिममा को-को छन् भन्ने कुरालाई हालसम्म ‘सस्पेन्स’ नै राखिएको छ ।
@parikalanewsofficial
नेपाली फिल्म उद्योगमै सर्वाधिक ग्रस कलेक्सनको इतिहास रचेको ‘पूर्ण बहादुरको सारङ्गी’ पछि विनोद पौडेलले ‘अभिमन्यु’ निर्माण गरेका थिए । अभिमन्यु सोचेको व्यापार गर्न सकेन । र अहिले उनको अर्को फिल्म ‘रोल नं १’ प्रदर्शनको तयारीमा छ । यी तीन निर्माण यात्रापछि आफ्नो चौथो प्रोजेक्टमा उनी आफैं निर्देशकको कुर्सीमा बस्न लागेका हुन् । निर्माताका रूपमा आफूलाई अब्बल सावित गरिसकेका पौडेलले निर्देशकको रूपमा पर्दामा कस्तो जादु देखाउनेछन् भन्ने कुरा भने फिल्म रिलिज पश्चात थाहा हुनेछ ।
Discussion about this post