दौरा-सुरुवाल र जुँगामा देखिइन् पूजा शर्मा: नयाँ वर्षमा विजय बरालसँग ‘रत्यौली’ खेल्ने घोषणा

इटहरी/ नायिका पूजा शर्मालाई कहिल्यै दौरा-सुरुवाल, ढाका टोपी र ओठमा जुँगासहित देख्नुभएको छ ? नयाँ वर्ष २०८३ सालको पहिलो दिन सार्वजनिक भएको एउटा पोस्टरले यस्तै अचम्मको दृश्य प्रस्तुत गर्दै दर्शक र फिल्म वृत्तमा कौतूहल पैदा गरेको छ । यो दृश्य हो, भर्खरै निर्माण घोषणा गरिएको नयाँ नेपाली फिल्म ‘रत्यौली’ को । सार्वजनिक पोस्टरमा नायिका पूजा शर्मा र नायक विजय बराल ‘रत्यौली’को माहोलमा छमछमी नाचिरहेको देख्न सकिन्छ ।

पूजाको यो विल्कुलै फरक ‘लुक्स’ र फिल्मको शीर्षकले नै फिल्म पूर्ण रूपमा मनोरञ्जनात्मक बन्ने विश्वास दिलाएको छ । यस फिल्ममार्फत नेपाली फिल्म क्षेत्रमा एउटा नयाँ जोडीको उदय हुँदैछ । नाईटिङ्गेल ईन्टरटेन्मेन्ट प्रा.लि र पूजा शर्मा प्रोडक्सनको संयुक्त निर्माणमा बन्न लागेको यस फिल्ममा पूजा शर्मा र विजय बराल पहिलोपटक एकसाथ देखिने पक्का भएको हो । फरक शैलीका दुई कलाकारको यो सहकार्य दर्शकका लागि निकै चासोको विषय बनेको छ ।

फिल्मको विषयवस्तु अहिलेसम्म गोप्य राखिए पनि यसको प्राविधिक तथा निर्माण टोली निकै बलियो देखिएको छ । मुस्कान ढकालको निर्देशन रहने यस फिल्मलाई सुरज आचार्यले निर्माण गर्दैछन् । ३२ वर्षदेखि फिल्म क्षेत्रमा निरन्तर सक्रिय आचार्यको अनुभवले ‘रत्यौली’ लाई थप मजबुत बनाएको छ । १०० भन्दा बढी नेपाली फिल्ममा प्रोडक्सन डिजाइनरको रूपमा काम गरिसकेका आचार्यले बलिउडमा पनि आफ्नो छुट्टै पहिचान बनाएका छन् ।

@parikalanewsofficial

उनले ‘उचाई’, ‘फर्जी’, ‘मिराई’, ‘टिसोन नाइडु’ र ‘दश का दम’ लगायतका ठूला भारतीय प्रोजेक्टहरूमा ‘लाइन प्रोड्युसर’को रूपमा काम गरिसकेका छन् । यसअघि ‘मेरो लभ स्टोरी’ र ‘कर्मयोद्धा’ जस्ता फिल्ममा सह-निर्माता र ‘वरमाला’ मा निर्माताको भूमिका निर्वाह गरिसकेका सुरजले यसपटक ‘रत्यौली’ मार्फत दर्शकलाई भरपुर मनोरञ्जन दिने अपेक्षा गरिएको छ ।