एउटा सामान्य ‘पाले’ कसरी बन्छ ‘सर’ ? सन्देश घिमिरेले दशैंमा ल्याउँदै ‘पाले सर’

इटहरी/ नयाँ वर्षको उत्साहसँगै नेपाली फिल्म क्षेत्र नयाँ फिल्म घोषणा, रिलिज मिति घोषणा, पोष्टर सार्वजनिक लगायतका गतिविधि हुने गर्छन् । यसपटक पनि २०८३ सालको आगमन सँगै हिजो वैशाख १ गते सोही माहौल भयो, झण्डै १ दर्जन फिल्मका गतिविधि देखियो । यही माहौलमा एउटा नयाँ फिल्म पनि थपियो । लामो समयदेखि नेपाली फिल्म उद्योगमा सक्रिय रहँदै आएका सन्देश घिमिरेले नयाँ वर्षको अवसर पारेर आफ्नो नयाँ फिल्म ‘पाले सर’को औपचारिक घोषणा गरेका छन् ।

घिमिरे हाल धरानस्थित ‘फ्रेन्ड्स सिनेमा हल’का म्यानेजर समेत हुन् । फिल्मको घोषणासँगै निर्माण पक्षले एक आकर्षक ‘टाइटल थिम पोस्टर’ पनि सार्वजनिक गरेको छ । हरियो रङलाई प्राथमिकता दिइएको उक्त पोस्टरले नितान्त गाउँले परिवेश र मौलिकता झल्काउँछ । पोस्टरमा दुईवटा पारम्परिक घरहरू र ती दुई घरको बीचमा रहेको बाटोमा एक व्यक्ति छाता ओढेर गन्तव्यतिर लम्किँदै गरेको रहस्यमयी दृश्य देख्न सकिन्छ ।

फिल्मको नाम जति रोचक छ, यसको कथा पनि त्यत्तिकै कौतुहलपूर्ण हुने सङ्केत निर्माण पक्षले दिएको छ । ‘पाले सर’ ले मुख्यतया एउटा सामान्य ‘पाले’ अर्थात् चौकीदारले जीवनमा कसरी ‘सर’ सम्मको यात्रा तय गर्छ भन्ने सङ्घर्ष र प्रेरणाको कथा बोल्नेछ भन्ने अनुमान लगाउन सकिन्छ । यस फिल्मको कथा लेखन र निर्देशनको कार्य स्वयं सन्देश घिमिरेले नै सम्हाल्दैछन् ।

@parikalanewsofficial

यद्यपि, दर्शकहरूको उत्सुकतालाई कायम राख्न निर्माण पक्षले हालसम्म फिल्मका कलाकार, प्राविधिक टोली र निर्माताको नाम भने खुलाएको छैन । निर्देशक घिमिरेका अनुसार यस फिल्मलाई आगामी वर्ष २०८४ सालको दशैंको विशेष अवसर पारेर दर्शकमाझ ल्याउने लक्ष्य राखिएको छ । रोचक कुरा त के छ भने, निर्माण अगावै यस फिल्मको सिक्वेल समेत निर्माण गरिने बताइएको छ । फिल्मका मुख्य कलाकारहरू र प्राविधिक टोलीको बारेमा छिट्टै नै जानकारी गराइने निर्देशक घिमिरेले बताएका छन् ।