महाराज र नग्न अवतार: पुष्पले गरे रगतको औँठाछाप, दशैंमा आउँदै ‘महाराजाधिराज’

इटहरी/ नेपाली फिल्म उद्योगमा फिल्म साइन गर्दा कागजमा मसीले हस्ताक्षर गर्ने सामान्य परम्परा छ । तर, अभिनेता पुष्प खड्काले भने प्रतीक्षित फिल्म ‘महाराजधिराज’ का लागि आफ्नै औंला काटेर रगतको औंठाछाप लगाएका छन् । नयाँ वर्षको अवसर पारेर निर्माण पक्षले पुष्पलाई फिल्ममा मुख्य भूमिकामा अनुबन्ध मात्र गरेको छैन, उनको यो चरम समर्पण र रहस्यमयी ‘फर्स्ट लुक’ सार्वजनिक गर्दै दर्शकमाझ ठूलो तरङ्ग ल्याइदिएको छ ।

निर्माण पक्षले सार्वजनिक गरेको पोस्टरले थ्रिलर र पिरियड ड्रामाको गहिरो सङ्केत गर्छ । पोस्टरमा पुष्पलाई दुई नितान्त फरक र विपरित अवस्थामा प्रस्तुत गरिएको छ । एकातिर उनी शिरमा श्रीपेच, हातमा राजदण्ड र शाही पोसाकमा सजिएर ‘महाराज’को गरिमामा उभिएका छन् । त्यसैको ठीक अगाडि एउटा पुरानो ‘भिन्जेट’ कुर्सीमा उनी पूर्ण नग्न, शारीरिक रूपमा अत्यन्त दुब्लो र कमजोर अवस्थामा बसेका छन् । यी दुई दृश्यले पात्रको जीवनमा आउने अकल्पनीय उतारचढावलाई दर्साउँछ ।

यसै सन्दर्भलाई जोड्दै निर्माण टिमले गहिरो अर्थ बोकेको स्लोगन समेत सार्वजनिक गरेको छ । “सत्कर्म सद्भावका कदमले हरपल साथ निभाओस्, वैमनस्यता बेइमानी संकट कुनै पल नजिक नआओस् ।” पुष्पले यस भूमिकालाई आफ्नो अभिनय यात्राको सबैभन्दा ठूलो चुनौती र अवसरका रूपमा लिएका छन् । फिल्मको चरित्रमा पूर्ण रूपमा डुब्नकै लागि उनले सुटिङ नसकिँदासम्म अन्य कुनै पनि फिल्म वा म्युजिक भिडियो नखेल्ने घोषणा गरेका छन् ।

@parikalanewsofficial

यति मात्र होइन, उनी टिकटक, इन्स्टाग्राम र युट्युब जस्ता कुनै पनि सामाजिक सञ्जालका दृश्य सामग्रीमा समेत देखिने छैनन् । समीक्षकबाट रुचाइएको फिल्म ‘प्रेमगञ्ज’का निर्देशक परिक्षद सेनको यो ‘ड्रिम प्रोजेक्ट’मा कलाकारहरूको ठूलो टिम छ । प्रस्तुतकर्ता विराज विष्टका अनुसार अभिनयमा अब्बल मानिएका अग्रज र नयाँ पुस्ताको सशक्त मिश्रण यस फिल्ममा हेर्न पाइनेछ । फिल्ममा पुष्प खड्का, नीर शाह, आर्यन सिक्देल, रमेश उप्रेती, वर्षा राउत, उषा रजक, हिउँबाला गौतम, जयकिशन बस्नेत, शिशिर भण्डारी, गजित विष्ट, आशा पौडेल प्रमुख भूमिकामा छन् ।

यसका अतिरिक्त अन्य ८० जना कलाकारहरूले स्क्रिन सेयर गर्नेछन् । छत्रेश्वर म्यानेजमेन्ट प्रालिको ब्यानरमा निर्माण हुने यस फिल्मको कथा निर्देशक सेन स्वयंले लेखेका हुन् । यही वैशाखको दोस्रो सातापछि छायांकन सुरु गरिने तयारीमा रहेको यो फिल्म सुनसरीको श्रीलंका टापुबाट सुरु भई काठमाडौं, भक्तपुर र कीर्तिपुरका विभिन्न ऐतिहासिक तथा सुन्दर स्थानहरू सुटिङ गरिनेछ । नवराज थापाले छायांकन गर्ने फिल्मका निर्माताहरुमा रवि खड्का, शिवराज पौडेल र टोपेन्द्र विष्ट रहेका छन् । फिल्मलाई आगामी बडादशैंको फूलपातीमा रिलिज गर्ने योजना निर्माण टिमको छ ।