‘सँगै मिलेर इतिहास रचौं’ भन्दै अनमोल केसीले फ्यानलाई समर्पित गरे आगामी ४ ठूला फिल्म

इटहरी/ नेपाली फिल्म क्षेत्रमा ‘सुपरस्टार’ को छवि बनाएका अभिनेता अनमोल केसीको आगामी प्रोजेक्टलाई लिएर दर्शक र फिल्म वृत्तमा सधैं विशेष चासो रहने गर्छ । दर्शकको त्यही उत्सुकता र पर्खाइलाई सम्बोधन गर्दै अनमोलले एकैपटक आफ्ना ४ ठूला फिल्मको ‘लाइनअप’ सार्वजनिक गरेका छन् । सामाजिक सञ्जालमार्फत आफ्ना आगामी प्रोजेक्टहरू ‘लक’ भएको सुखद जानकारी दिँदै उनले आफूलाई अर्थपूर्ण र उत्कृष्ट कथाहरूसँग जोडेकोमा ब्रह्माण्डप्रति कृतज्ञता व्यक्त गरेका छन् ।

उनले नेपाली फिल्म क्षेत्रका प्रतिष्ठित चार फरक ब्यानरहरूसँग सहकार्य गर्न लागेको स्पष्ट पारेका हुन् । उनले सनराइज पिक्चर्सको ब्यानरमा बन्ने ‘बाटुलो जुन’, सुहाना इन्टरटेनमेन्टको ब्यानरमा बन्ने ‘ए मेरो हजुर ५’, एप्पल इन्टरेनमेन्टको ब्यानरमा बन्ने ‘बिफोर वी मिट’ र अनन्या फिल्मस् को ब्यानरमा बन्ने ‘जेरी: द लास्ट क्लाइम्ब’ फिल्मको लाइनअप सार्वजनिक गरेका हुन् । यी प्रतिष्ठित निर्माता र ब्यानरहरूसँग काम गर्न पाउनुलाई उनले आफ्नो लागि ठूलो सम्मान मानेका छन् ।

@parikalanewsofficial

विश्वभर छरिएर रहेका दर्शक तथा शुभचिन्तकहरूको माया नै आफ्नो असली तागत भएको बताउँदै अनमोलले आफ्ना यी आगामी प्रोजेक्टहरू तिनै फ्यानहरूप्रति समर्पित गरेका छन् । स्ट्याटसको अन्त्यमा उनले आफ्ना दर्शकलाई उत्साहित गर्दै लेखेका छन्, “आउनुहोस्, हामी सँगै मिलेर इतिहास रचौं ।”
एकैपटक ब्लकबस्टर सिक्वेलदेखि नयाँ लभस्टोरीसम्मका फिल्ममा अनमोल अनुबन्धित भएको खबरले यतिबेला उनका फ्यानहरूमा नयाँ उत्साह थपिएको छ भने बक्स अफिसमा यी फिल्महरूले कस्तो तहल्का मच्चाउनेछन् भन्ने कौतूहल सुरु भएको छ ।