जीवनमरणको संघर्ष जित्दै गायक पवनदीप राजन घर फर्किए

इटहरी/ गम्भीर सवारी दुर्घटनापछि अस्पतालको शैयामा जीवन र मृत्युबीचको संघर्ष गरेका लोकप्रिय भारतीय गायक पवनदीप राजन अन्ततः घर फर्किएका छन् । ‘इण्डियन आइडल १२’ का विजेता पवनदीप २५ दिनको उपचारपछि नोयडास्थित अस्पतालबाट डिस्चार्ज भएका हुन् । वैशाख २२ गते (मे ५) उत्तर प्रदेशको अमरोहा नजिकै भएको दुर्घटनामा उनको टाउकोमा गम्भीर चोट लागेको थियो भने दुबै खुट्टा भाँचिएपछि तीनपटक शल्यक्रिया गर्नुपरेको थियो ।

लामो उपचारपछि उनले बिहीबार इन्स्टाग्राममार्फत घर फर्किएको जानकारी दिएका छन् । विमानमा मुस्कुराउँदै बसेको फोटो पोस्ट गर्दै उनले लेखेका छन्, “डिस्चार्ज भएर घर जाँदैछु । तपाईंहरू सबैको माया, आशीर्वाद र शुभेच्छाको लागि धन्यवाद ।”

@parikalanewsofficial

उनको स्वास्थ्य सुधारको खबरले फ्यानदेखि कलाकारसम्म सामाजिक सञ्जालमा शुभकामनाको वर्षा गरिरहेका छन् । नेपाली दर्शकहरूका लागि पनि पवनदीप चिरपरिचित नाम हुन्, उनले नेपाली फिल्म ‘प्रेमगीत ३’ मा समेत स्वर दिएका थिए । घर फर्किएसँगै अब उनका प्रशंसकहरू उनलाई फेरि साङ्गीतिक यात्रामा सुन्ने आशामा छन् ।