भारतमा पाकिस्तानी कलाकारमाथि पूर्ण प्रतिबन्ध, हानिया आमिर ‘सरदार ३’ बाट निकालिइन्

एजेन्सी/ भारत र पाकिस्तानबीचको तनावको सीधा असर दुवै देशका सांस्कृतिक आदानप्रदानमा परेको छ । पछिल्लो पटक पहलगाममा भएको आतंकवादी हमलापछि भारतमा पाकिस्तानी कलाकारहरूमाथि पूर्ण प्रतिबन्ध लगाइएको छ । यसको नयाँ शिकार लोकप्रिय पाकिस्तानी अभिनेत्री हानिया आमिर बनेकी छिन्, जसलाई भारतीय फिल्म ‘सरदार ३’ बाट निकालिएको खबर सार्वजनिक भएको छ ।

भारतीय फिल्ममा काम गर्ने कर्मचारीहरूको संस्था फेडरेशन अफ वेस्टर्न इन्डिया सिने एम्प्लइजले यो सम्म घोषणा गरेको छ कि यदि कुनै भारतीय नागरिकले पाकिस्तानी कलाकारसँग काम गरेको पाइएमा उनीहरूमाथि देशद्रोहको मुद्दा चलाइनेछ ।
यसै सन्दर्भमा, हानिया आमिरले दिलजीत दोसांझ र सोनम बाजवा अभिनीत पञ्जाबी फिल्म ‘सरदार ३’ मार्फत भारतीय फिल्ममा डेब्यु गर्ने तयारी गरेकी थिइन् ।

@parikalanewsofficial

खबर अनुसार उनले एक महिनाअघि मात्र बेलायतमा फिल्मको छायांकन पनि पूरा गरिसकेकी थिइन् । तर, पहलगाम हमलापछि ‘सरदार ३’ को चर्को आलोचना भयो । यस विवादका कारण निर्माताहरूले हानियालाई फिल्मबाट हटाउने कठोर निर्णय लिएका छन् । अब हानियासँग खिचिएका सबै दृश्यहरू अर्की अभिनेत्री राखेर पुनः छायांकन गरिनेछ ।

यस सबैसँग एउटा रोचक कुरा यो छ भने, फिल्मबाट हटाइएको खबरका बाबजुद पनि हानियालाई भारतीय गायक बादशाहको एउटा गीतको प्रचार गर्दै गरेको देखिएको छ । स्मरण रहोस्, हानियाले अप्रिल २७ मा सिन्धु जल सन्धिबारे पनि आफ्नो धारणा राखेकी थिइन् । उनले लेखेकी थिइन्, ‘मेरा किसानहरू र मेरो समुदायले पानीको संकटको सामना गरिरहेको देख्दा मेरो मन दुख्छ । सिन्धु हाम्रो जीवन रेखा हो । जनताको भविष्यलाई ध्यानमा राख्दै यो मुद्दा शान्तिपूर्ण रूपमा समाधान गर्न म अनुरोध गर्दछु ।’ राजनीतिक तनावले सांस्कृतिक क्षेत्रमा पारेको यो असरले दुई देशबीचको सम्बन्धको जटिलतालाई फेरि एकपटक सतहमा ल्याएको छ ।