महाकुम्भकी ‘भाइरल गर्ल’ मोनालिसाको विवाहमा नयाँ ट्विस्ट: पति फरमानविरुद्ध मुद्दा

एजेन्सी/ इन्टरनेटको दुनियाँमा रातारात स्टार बनेकी महाकुम्भकी ‘भाइरल गर्ल’ अर्थात् मोनालिसाको जीवनले एउटा गम्भीर र विवादास्पद मोड लिएको छ । एक महिनाअघि मात्र मुस्लिम युवासँग अन्तरधार्मिक विवाह गरेर चर्चाको शिखरमा पुगेकी उनी अहिले उमेर विवाद, फर्जी कागजात र गम्भीर कानुनी झमेलाको केन्द्रविन्दु बनेकी छिन् । मध्य प्रदेशको खरगोन प्रहरीले अनुसन्धानपछि मोनालिसा नाबालिग रहेको ठहर गर्दै उनका पति फरमानविरुद्ध पोक्सो लगायतका गम्भीर अपराधमा मुद्दा दर्ता गरेको छ ।

राष्ट्रिय अनुसूचित जनजाति आयोगले प्राप्त गरेको सरकारी अस्पतालको आधिकारिक रेकर्डअनुसार मोनालिसाको जन्म ३० डिसेम्बर २००९ मा भएको हो । यस आधारमा गत मार्च ११ मा विवाह गर्दा उनको उमेर जम्मा १६ वर्ष, २ महिना र १२ दिन मात्र थियो । तर, कानुनी कारबाहीबाट बच्न उमेर बढाएर फर्जी जन्म दर्ता बनाइएको अनुसन्धानबाट खुलेको छ । केरलाको नैनार देव मन्दिरमा विवाह सम्पन्न गर्दा दम्पतीको आधार कार्डमा उल्लेखित उमेरलाई आधार मानिएको थियो । पछि ग्राम पञ्चायतमा विवाह दर्ता गर्दा महेश्वर नगरपालिकाबाट जारी गरिएको नक्कली जन्म दर्ता पेश गरिएको थियो, जसमा जन्ममिति १ जनवरी २००८ अर्थात् वास्तविकभन्दा करिब दुई वर्ष अघि उल्लेख थियो ।

आयोगले उक्त फर्जी कागजात तत्काल खारेज गर्न स्थानीय अधिकारीहरूलाई कडा निर्देशन दिइसकेको छ । नाबालिगसँग विवाह गरेको पुष्टि भएपछि प्रहरीले पति फरमानविरुद्ध कडा कानुनी डण्डा चलाएको छ । उनीमाथि पोक्सो सहित भारतीय न्याय संहिता अन्तर्गत आपराधिक षड्यन्त्र र गैरकानुनी विवाहको मुद्धा चलेको छ भने अनुसूचित जाति तथा अनुसूचित जनजाति (अत्याचार निवारण) ऐन अन्तर्गत पनि मुद्धा चलाइएको छ ।

@parikalanewsofficial

यस प्रकरणलाई सामान्य कानुनी अपराधको रूपमा मात्र हेरिएको छैन । मार्च १७ मा आयोगसमक्ष यो विषय प्रस्तुत गरेका अधिवक्ता प्रथम दुबेले यसमा ठूलो राजनीतिक तथा साम्प्रदायिक षड्यन्त्र लुकेको दाबी गरेका छन् । उनका अनुसार यो विवाहलाई “लभ जिहाद” को विरुद्धमा एउटा काउन्टर-न्यारेटिभ निर्माण गर्ने सुनियोजित योजनाको हिस्सा बनाइएको थियो । यस कार्यलाई सफल बनाउन केरलाका सीपीआई नेताहरू र पपुलर फ्रन्ट अफ इन्डियाका सदस्यहरूको प्रत्यक्ष संलग्नता रहेको गम्भीर आरोप लगाइएको छ ।

घटनाको संवेदनशीलता र राजनीतिक दाउपेचको आशंकालाई मध्यनजर गर्दै राष्ट्रिय अनुसूचित जनजाति आयोगले कडा कदम चालेको छ । आयोगले केरला र मध्य प्रदेश दुवै राज्यका प्रहरी महानिर्देशक हरूलाई आगामी अप्रिल २२ मा नयाँ दिल्लीस्थित मुख्यालयमा उपस्थित हुन समन जारी गरेको छ । साथै, अनुसन्धान टुंगोमा नलागेसम्म हरेक तीन दिनमा दुवै राज्यबाट प्रगति विवरण बुझाउन निर्देशन दिइएको छ ।

सन् २०२५ को प्रयागराज महाकुम्भमा त्रिवेणी संगम किनारमा रुद्राक्ष बेचिरहेकी एक किशोरीको तस्बिर सामाजिक सञ्जालमा भाइरल भयो । आफ्नो सुन्दरताका कारण रातारात ‘कुम्भ ब्युटी’ बनेकी मोनालिसालाई मिडिया, इन्फ्लुएन्सर र मोडलिङका अफरहरूले घेरे । यसै क्रममा एक फिल्मको छायाङ्कनका दौरान उनको भेट फरमान खानसँग भयो । फरमानका अनुसार उनीहरू ६ महिना प्रेम सम्बन्धमा रहे र गत मार्च ११ मा केरलाको अरुमनूर श्री नैनार देव मन्दिरमा नाटकीय रूपमा अन्तरधार्मिक विवाह गरेका थिए । एक महिनाअघि ‘रियल केरला स्टोरी’ भन्दै भाइरल भएको यो प्रेमकथा अहिले गम्भीर कानुनी अनुसन्धानको घेरामा फसेको छ ।