‘रिल’ र ‘रियल’ एकैसाथ अस्ताए प्रशान्त, ‘लडाई पहिचानको’ चल्दै गर्दा हलमै छायो सन्नाटा

इटहरी/ कलाकारिताको दुनियाँमा कहिलेकाहीँ यस्ता संयोगहरू घट्छन्, जसले मानिसको मन नै हल्लाइदिन्छ । यस्तै एक दुर्लभ र दुखद संयोग आज विराटनगरको सेन्ट्रल मल्टिप्लेक्समा फिल्म ‘लडाई पहिचानको’ विशेष प्रदर्शनका क्रममा देखिएको छ । पर्दामा फिल्मका प्रमुख पात्र प्रशान्त तामाङको मृत्युको दृश्य समावेश गरिएको छ । यस्तैमा वास्तविक जीवनमा पनि उनको निधन भएको खबर हलभित्र आइपुग्यो ।

फिल्मको ‘रिल’ र जीवनको ‘रियल’ दुवैतर्फ कलाकार प्रशान्त तामाङ एकैसाथ अस्ताउँदा उत्साहले भरिएको हल क्षणभरमै शोकमा डुब्यो । इन्डियन आइडल विजेता तथा फिल्मका प्रमुख कलाकार प्रशान्त तामाङको भारतको नयाँ दिल्लीस्थित निवासमा निधन भएको खबर शो चलिरहेकै समयमा प्राप्त भएको थियो । यो खबरले दर्शक तथा उपस्थित फिल्म युनिटलाई स्तब्ध बनायो । फिल्म सकिएलगत्तै निर्माण टिम र दर्शकले हलभित्रै एक मिनेट मौन धारण गरी दिवंगत आत्माको चीर शान्तिको कामना गरेका थिए ।

आदिवासी जनजाति समुदायको पहिचानको लडाइँ र कोशी प्रदेशको नामाकरणको मुद्दालाई मुख्य विषयवस्तु बनाएको यो फिल्मको विशेष शो विराटनगरस्थित किरात याक्थुङ चुम्लुङ, किरात राई यायोक्खा र किरात याक्खा छुम्मा लगायतका जातीय संस्थाहरुको संयुक्त पहलमा आयोजना गरिएको थियो । दुईवटै हल बुक गरेर देखाइएको शोमा दर्शकको बाक्लो उपस्थिति थियो ।

@parikalanewsofficial

भिम लामा फिल्मस् प्रालिको ब्यानरमा निर्मित यो फिल्म गत मङ्सिर ५ गते देशव्यापी प्रदर्शनमा आएको थियो । तर, सेन्सर बोर्डले फिल्मका महत्त्वपूर्ण दृश्यहरूमा अत्यधिक कैँची चलाएपछि कथाको भाव मरेको र दर्शकलाई खल्लो लागेको भन्दै दुई दिनमै हलबाट उतारिएको थियो । अहिले निर्माण पक्षले ती काटिएका दृश्यहरूलाई संशोधन र परिमार्जन गरी ‘लडाई पहिचानको’ लाई पुनः दर्शकमाझ ल्याएको हो ।

निर्देशक भिम लामाका अनुसार, परिमार्जित संस्करण सहितको विशेष प्रदर्शनी विभिन्न सहरहरूमा सुरु गरिएको छ । यसअघि शनिबार धरानमा पनि यो फिल्मको विशेष प्रदर्शनी भव्यताका साथ सम्पन्न भएको थियो । फिल्मका लेखक, निर्माता तथा निर्देशक भिम लामाका अनुसार फिल्ममा वरिष्ठ कलाकारहरूको अभिनय रहेको छ ।

फिल्ममा स्वर्गीय प्रशान्त तामाङसहित नायिका करिश्मा मानन्धर, नायक धिरेन शाक्य, सुरवीर पण्डित, जेनी घिसिङ, प्रेम सुब्बा, किशोर सम्बाहाम्फे, नवीन मेन्याङ्बो, परशुराम चौधरी लगायतको अभिनय छ । साथै दिलु सुब्बा, शर्मिला राई, सुबास योन्जन तामाङ, अरुण प्रधान, दिनेश कोइराला र रामजी बिष्ट जस्ता कलाकारहरूले पनि यसमा भूमिका निर्वाह गरेका छन् । फिल्मको निर्माणमा भिम लामालाई रामजी विष्ट, दिलु सुब्बा र उमेश तामाङले सघाएका छन् भने नृत्य निर्देशन मणिकुमार लिम्बू र सानुराजा थेगिमले गरेका छन् ।