मामा शिव रेग्मीको विरासत थाम्दै भान्जी एकता: ‘हर्ष’को भव्य प्रिमियर सम्पन्न

इटहरी/ ललितपुरको लविम मल बुधबार साँझ नेपाली फिल्मका दिग्गज अनुहारहरूको उपस्थितिले धपक्कै बलेको थियो । सन्दर्भ थियो- भोलि शुक्रबार अर्थात् मंसिर १२ गतेदेखि प्रदर्शनमा आउन लागेको फिल्म ‘हर्ष’ को भव्य प्रिमियर शो । तर, यो प्रिमियर केवल एउटा फिल्मको प्रदर्शनी मात्र बनेन, बरु स्वर्गीय निर्देशक शिव रेग्मीको सम्झना र नयाँ पुस्ताको उदयको एक विशेष संगम बन्न पुग्यो ।

प्रिमियरमा स्वर्गीय निर्देशक शिव रेग्मीकी धर्मपत्नी ज्ञानु रेग्मीको उपस्थिति विशेष रह्यो । आफ्नी भान्जी एकता पौडेलले निर्देशनमा डेब्यु गरेको देख्दा उनी निकै भावुक र खुसी देखिइन् । “१२ वर्षपछि खोला पनि फर्किन्छ भन्छन्, हाम्रो परिवारमा पनि आज त्यस्तै भएको छ,” ज्ञानुले भनिन्, “१२ वर्षपछि भान्जी एकताले फिल्म निर्माण र निर्देशन गर्ने आँट गरेकी छन् । आज बिहीबार शिवजीको वार्षिकी पनि हो, यो संयोगले मलाई एकदमै खुसी लागेको छ ।”

उनले शिव रेग्मीले नेपाली फिल्म उद्योगलाई आफ्नो घर र कलाकारलाई सन्तान मान्ने गरेको स्मरण गर्दै भान्जीलाई सफलताको शुभकामना दिइन् । लामो समयपछि मुम्बईबाट आएर नेपाली फिल्मको प्रिमियरमा सहभागी भएकी अभिनेत्री निरुता सिंहका लागि माहौल निकै भावुक बन्यो । फिल्मको सुरुवातमै आफ्ना ‘मेन्टर’ शिव रेग्मीको तस्बिर देखेपछि उनले आँसु थाम्न सकिनन् ।

@parikalanewsofficial

निरुताले भनिन्, “हर्ष एकदमै सन्देशमूलक फिल्म बनेको छ । यस्ता घटनाहरू मैले समाज र घरपरिवारमा देखेकी छु । एकताजीको पहिलो निर्देशकीय प्रयास उत्कृष्ट छ, त्यसैले सबैले एकपटक यो फिल्म हेर्नुहोला ।” फिल्मका मुख्य अभिनेता खगेन्द्र लामिछाने प्रिमियरमा मिलेको प्रतिक्रियाले निकै उत्साहित देखिए । आफूले पहिलो पटक फरक धारको भूमिका निर्वाह गरेको र त्यसलाई दर्शकले रुचाइदिएकोमा उनले खुसी व्यक्त गरे ।

यस्तै, अभिनेत्री वर्षा राउत र अभिनेता तथा व्यवसायी संजोग कोइरालाले ‘हर्ष’लाई एउटा फरक अनुभव दिने पूर्ण पारिवारिक फिल्मको संज्ञा दिँदै सबैलाई हेर्न आग्रह गरे । डेब्यु निर्देशक एकता पौडेलले आफ्नो बाल्यकालको सपना पूरा भएको बताइन् । “आज प्रिमियरमा फिल्म हेरेका पाहुनाहरूले मामा शिव रेग्मीको झल्को दिन सफल भएको प्रतिक्रिया दिनुभएको छ,” निर्देशक पौडेलले भनिन्, “यसले मलाई खुसी त दिएको छ नै, साथसाथै आगामी दिनमा अझ राम्रो काम गर्नुपर्ने चुनौती पनि थपिदिएको छ ।”

अष्टलक्ष्मी प्रोडक्सन्स् र ई-प्राईम मुभिजको ब्यानरमा निर्माण भएको यो फिल्मको कथा निर्देशक पौडेल स्वयंले लेखेकी हुन् । फिल्ममा खगेन्द्र र वर्षाका अलावा निर शाह, सन्तोष पन्त, शर्मिला मल्ल, माओत्से गुरुङ, विशाल पहाडी, लुनिभा तुलाधर लगायतका दिग्गज कलाकारहरूको अभिनय रहेको छ । बालकलाकार साइमन वादीको अभिनयले पनि दर्शकको ध्यान खिच्ने अपेक्षा गरिएको छ । आलोक शुक्लाको छायांकन रहेको फिल्ममा प्रशन्न पौडेल र विकास पौडेल निर्माता तथा हिक्मत चोखाल कार्यकारी निर्माता रहेका छन् ।