‘लालिमा’को चरित्रमा डुब्न १० यौनकर्मीसँग रोश्नीले साटिन् पीडा

इटहरी/ कुनै पनि चरित्रलाई पर्दामा न्याय गर्न त्यो पात्रको मनोविज्ञान बुझ्न नितान्त जरुरी हुन्छ । समाजले खुलेर कुरा गर्न नचाहने र गुपचुप राखिने ‘यौनकर्मी’को भूमिकामा आफूलाई ढाल्न नायिका रोश्नी कार्कीले पनि यस्तै एउटा कठिन र यथार्थपरक बाटो रोजिन् । यही फागुन २९ गतेबाट प्रदर्शनमा आउन लागेको फिल्म ‘लालिमा’मा शीर्ष भूमिका निर्वाह गरेकी उनले आफ्नो चरित्र निर्माणका लागि १० जना वास्तविक यौनकर्मीसँग भेटेर उनीहरूको भोगाइलाई नजिकबाट नियालेकी छन् ।

थिएटर पृष्ठभूमिबाट आएकी रोश्नीका लागि यो भूमिका नौलो मात्र थिएन, निकै चुनौतीपूर्ण पनि थियो । समाजमा यौन पेसालाई हेर्ने दृष्टिकोण र यसको गोपनीयताका कारण उनलाई पात्रको अध्ययन गर्न सहज थिएन । “मैले चिनेको कोही यौनकर्मी हुनुहुन्नथ्यो, र समाजमा आफूलाई यौनकर्मी भनेर खुलेर चिनाउने को नै हुन्छ र ?” रोश्नी भन्छिन्, “तर चलचित्र यौनकर्मीको मानसिकताबारे बढी केन्द्रित भएकाले नेपाली परिवेशका यौनकर्मीको वास्तविक अवस्था बुझ्न मलाई उहाँहरूसँगै भेट्नु आवश्यक थियो ।”

अन्ततः निर्माण टिमको पहलमा रोश्नीले १० जना यौनकर्मीसँग कुराकानी गर्ने अवसर पाइन् । ती भेटहरूमा उनले कलेज पढ्ने कलिला किशोरीदेखि अधवैँशे उमेरसम्मका महिलाहरूको आँसु र विवशता नजिकबाट सुनिन् । कुराकानीका क्रममा उनले पत्ता लगाइन् कि कसैको पनि रहर यो पेसामा आउने थिएन । “सबैजना केवल आर्थिक समस्या र बाध्यता टार्न मात्र यो पेसामा जोडिएका रहेछन्,” उनले आफ्नो अनुभव साट्दै भनिन्।

@parikalanewsofficial

उनीहरूको त्यही मनोदशा, समस्या र पीडाले रोश्नीलाई ‘लालिमा’ पात्रमा प्राण भर्न ठूलो सहयोग गरेको छ । समाजमा ठूलो संख्यामा रहेर पनि सीमान्तकृत र गुमनाम जीवन बाँचिरहेका ती महिलाहरूको प्रतिनिधित्व गर्न पाएकोमा रोश्नीलाई अहिले एक किसिमको सन्तुष्टि मिलेको छ । उनी भन्छिन्, “कलाकारको रूपमा म उहाँहरूको आवाज बनेकी छु । उहाँहरूका लागि मैले गर्न सक्ने काम गरेँ । कम्तीमा मैले उहाँहरूको मानसिकता र लुकेका समस्यालाई इमानदारीपूर्वक पर्दामा उतार्ने प्रयास गरेकी छु ।”