दुर्व्यवहार र मानसिक दबाबको आरोप लगाउँदै जेसिकाद्वारा ‘मिस ग्रान्ड नेपाल’को उपाधि त्याग

इटहरी/ बाहिरबाट जति झकिझकाउ र आकर्षक देखिन्छ, सौन्दर्य प्रतियोगिताको भित्री संसार त्यति नै चुनौतीपूर्ण र अँध्यारो हुन सक्छ भन्ने यथार्थलाई ‘मिस ग्रान्ड नेपाल २०२५’ की विजेता जेसिका सिंह ठकुरीको पछिल्लो कदमले छर्लङ्ग पारेको छ । ताज र उपाधिभन्दा आफ्नो मानसिक शान्ति तथा आत्मसम्मान ठूलो भएको निष्कर्ष निकाल्दै जेसिकाले ‘मिस ग्रान्ड नेपाल २०२५’ को उपाधि औपचारिक रूपमै त्यागेको घोषणा गरेकी छन् ।

सामाजिक सञ्जाल इन्स्टाग्राममा एक भावुक र कडा भिडियो वक्तव्य जारी गर्दै उनले भनेकी छन्, “उपाधि जित्नु मेरो जीवनको अत्यन्त गौरवपूर्ण क्षण थियो, तर आयोजक संस्थासँगको यात्रा भने अत्यन्त पीडादायी रह्यो ।” आफ्नो कार्यकालभर भोगेको मानसिक प्रताडना र धम्कीले गर्दा व्यक्तिगत गरिमा र मूल्य जोगाउन आफू यो बिन्दुमा पुग्न बाध्य भएको उनको प्रस्टोक्ति छ ।

@parikalanewsofficial

आफ्नो अप्ठ्यारो समयमा विश्वास र साथ दिने सम्पूर्ण समर्थकहरूप्रति आभार प्रकट गर्दै जेसिकाले अबका दिनमा शक्ति, स्वास्थ्य र आत्मसम्मानलाई प्राथमिकतामा राखेर अगाडि बढ्ने बताएकी छन् । उनको यो कदमले नेपाली सौन्दर्य प्रतियोगिताभित्र हुने भित्री अभ्यास, आयोजकको रवैया र प्रतियोगीको सुरक्षामाथि फेरि एकपटक गम्भीर प्रश्नचिह्न खडा गरेको छ ।