इटहरी/ एउटी नायिका, जो आफ्नो पहिलो मुख्य भूमिकालाई न्याय गर्न वास्तविक यौनकर्मीहरूको खोजीमा निस्किइन् । अर्की नायिका, जसले दर्शकको सल्लाह मानेर आफ्नो दुई दशक लामो ‘बोल्ड एन्ड ब्युटी’ छवि भत्काउँदै बोल्न नसक्ने ‘आमा’ को भूमिका रोजिन् । यस्तै फरक र चुनौतीपूर्ण पात्रहरूको कथा बोकेर आउँदैछ फिल्म – ‘लालिमा’ । फागुन २९ गतेबाट प्रदर्शनमा आउन लागेको यस फिल्मको ट्रेलरले यतिबेला युट्युब ट्रेन्डिङको नम्बर ४ मा कब्जा जमाउँदै दर्शकको ध्यान तानेको छ ।
फिल्मको शीर्ष भूमिका ‘लालिमा’मा छिन् नायिका रोश्नी कार्की । आफ्नो करिअरमै पहिलो पटक सिंगो फिल्म आफ्नै काँधमा बोक्नुपर्दा उनलाई सुरुमा निकै डर लागेको थियो । यस प्रस्तावलाई अवसर र चुनौती दुवै रूपमा लिएकी रोश्नी भन्छिन्, “मैले यसअघि यौनकर्मीहरूलाई नजिकबाट देखेकी पनि थिइनँ । त्यसैले चरित्र निर्माणका लागि उहाँहरूलाई भेट्नु मेरो लागि एकदमै फरक र नौलो अनुभव रह्यो ।”
@parikalanewsofficial
दुई दशकदेखि प्रायः ग्ल्यामरस र बोल्ड भूमिकामा देखिँदै आएकी नायिका उषा रजक यसपटक भने दर्शकलाई सरप्राइज दिँदैछन् । सामाजिक सञ्जालमा फ्यानहरूले ‘अब उमेरअनुसारको भूमिका गर्नुस्’ भन्दै दिएको सुझावलाई सम्मान गर्दै उनी फरक क्षमता भएकी अर्थात् बोल्न नसक्ने आमाको क्यारेक्टरमा प्रस्तुत भएकी हुन् । उनले आफ्नो लामो अभिनय यात्रामा ‘आमा’ को भूमिका रोजेको यो नै पहिलो पटक हो ।
रोश्नी र उषासँगै नायक जीवन भट्टराई, सुष्मा निरौला, घनश्याम जोशी, सबिन कट्टेल र शिशिर वाङ्देल मुख्य भूमिकामा छन् । फिल्मको कथा लेखन तथा निर्देशन रोशन मिराजले गरेका हुन् । फेथ आस्थाको प्रस्तुति रहेको यस फिल्मकी कार्यकारी निर्माता रीना लामा हुन् । नेसनल सिने ग्रुप नेपालले यो फिल्मलाई दर्शकमाझ पुर्याउँदैछ । कलाकारहरूको यो तहको समर्पण र मिहिनेतले ‘लालिमा’ लाई नेपाली बक्स अफिसमा कस्तो नतिजा दिलाउने हो, त्यो भने फागुन २९ को प्रदर्शनले नै बताउनेछ ।
Discussion about this post