समाजको नदेखिएको पाटो उजागर गर्दै ‘लालिमा’: चुनावी माहोलका बीच ट्रेलर ट्रेन्डिङमा

इटहरी/ समाजले प्रायः मौन बस्न रुचाउने ‘यौनकर्मीको यथार्थ र भोगाइ’लाई पर्दामा उतारेको फिल्म ‘लालिमा’को ट्रेलरले यतिबेला दर्शकको विशेष ध्यान तानेको छ । एकातिर चुनावको चटारोले समग्र फिल्म गतिविधि सुस्ताएको छ भने, अर्कोतिर सार्वजनिक भएको २४ घण्टा नबित्दै यस फिल्मको ट्रेलर युट्युबको फिल्म क्याटोगरी तर्फको ट्रेन्डिङमा चौथो स्थानमा उक्लिएको छ ।

लेखक तथा निर्देशक रोशन मिराजको निर्देशनमा तयार भएको यस फिल्ममा नायिका रोश्नी कार्कीले ‘लालिमा’ अर्थात् एक यौनकर्मीको मुख्य भूमिका निर्वाह गरेकी छन् । ट्रेलरले लालिमा र नायक जीवन भट्टराईबीचको प्रेम सम्बन्धलाई मात्र नदेखाएर, यौनकर्ममा होमिनुपर्दाको बाध्यता र त्यसले निम्त्याउने गम्भीर मानसिक विचलनलाई छर्लङ्ग पारेको छ । हेर्नुस् ट्रेलर ।

नायिका रोश्नी भन्छिन्, “यौनकर्मीहरू कुन पृष्ठभूमि, बाध्यता र कठिनाइले यो पेशामा पुग्छन् र त्यसले उनीहरूको मानसिक अवस्थामा कस्तो असर गर्छ भन्ने कुरालाई हामीले गहिराइबाट देखाउने प्रयास गरेका छौँ ।” फिल्ममा दर्शकका लागि अर्को रोचक पक्ष नायिका उषा रजकको भूमिका रहेको छ । निर्माण पक्षका अनुसार उनी ‘लालिमा’की बोल्न नसक्ने (फरक क्षमता भएकी) आमाको मार्मिक भूमिकामा प्रस्तुत भएकी छन् । ट्रेलरको अन्त्यतिर लालिमाले बच्चा जन्माएको दृश्य राखिएको छ, जसले कथामा कस्तो मोड आउला भन्ने गहिरो सस्पेन्स छोडेको छ ।

@parikalanewsofficial

फिल्ममा रोश्नी, जीवन र उषाका साथमा सुष्मा निरौला, घनश्याम जोशी, सबिन कट्टेल र शिशिर वाङ्देल जस्ता अनुभवी कलाकारहरूको बलियो उपस्थिति रहेको छ । महिलाहरूको कथा र व्यथा बोकेको यो फिल्मलाई अन्तर्राष्ट्रिय महिला दिवसको अवसर पारेर यही फागुन २९ गतेदेखि देशभरका फिल्म हलमा प्रदर्शनमा ल्याइँदैछ । फेथ आस्थाको प्रस्तुतिमा बनेको यस फिल्मकी कार्यकारी निर्माता रीना लामा हुन् भने नेसनल सिने ग्रुप नेपालले यसको वितरण गर्दैछ ।