इटहरी/ फिल्म ‘प्रसाद २’ पछि निकै रुचाइएको विपिन कार्की र केकी अधिकारीको जोडीलाई पुनः एकसाथ पर्दामा हेर्न आतुर दर्शकले अझै केही समय कुर्नुपर्ने भएको छ । आगामी चैत २७ गते रिलिज हुने भनिएको बहुप्रतीक्षित फिल्म ‘काजी’ पूर्वनिर्धारित मितिमा प्रदर्शन नहुने भएको हो । निर्माण पक्षका अनुसार फिल्मको केही प्रतिशत छायांकन अझै बाँकी रहेकाले रिलिज मिति पछि सारिएको हो । निर्माता रामप्रसाद रिजालले कलाकारहरूको कार्यतालिका नमिलेका कारण सुटिङ लम्बिएको जानकारी दिएका छन् ।
“हामी चैत २७ मै दर्शकमाझ आउने तयारीमा थियौँ, तर अब यही चैत २६ गतेपछि मात्र बाँकी छायांकन पुरा गर्नेछौँ,” उनले भने । हतारमा फिल्म ल्याउनुभन्दा पोस्ट प्रोडक्सनमा पर्याप्त समय दिएर उत्कृष्ट सिर्जना पस्कने निर्माण टिमको तयारी छ ।फिल्मको नयाँ प्रदर्शन मिति भने केही समयपछि मात्र सार्वजनिक गरिनेछ । ‘काजी’ पछि सर्नुले अभिनेता विपिन कार्कीकै अर्को फिल्म ‘पहाड’लाई भने ठूलो राहत मिलेको छ । यदि ‘काजी’ चैत २७ मै आएको भए त्यसको तीन दिनपछि मात्रै ‘पहाड’ हलमा आउने थियो ।
एउटै समयमा आफ्नै दुईवटा फिल्म रिलिज हुँदा कलाकारलाई प्रचारप्रसारमा पर्ने ठूलो दबाब अब भने टरेको छ । यसै फिल्ममार्फत निर्देशक लक्ष्मण रिजाल ८ वर्षपछि निर्देशनमा कमब्याक गर्दैछन् । आफूले खोजेजस्तै स्क्रिप्ट पाएकाले निर्देशनमा फर्किएको उनले बताए । यसअघि ‘कसम’, ‘धुँवा यो नसा’, ‘अलविदा’, ‘कायरा’ जस्ता फिल्म निर्देशन गरिसकेका रिजालले ‘डिसेम्बर फल्स’ र ‘गणपति’को निर्माण समेत गरेका थिए । प्रदीप भारद्वाजको लेखन रहेको यस फिल्मलाई चिन्तन राजभण्डारीले क्यामेरामा कैद गरेका हुन् भने कालीप्रसाद बाँस्कोटाको सङ्गीत रहेको छ ।
@parikalanewsofficial
रिजाल एण्ड रिजाल प्रोडक्सनको ब्यानरमा निर्माण भएको यस फिल्ममा विपिन र केकीका साथै गरिमा शर्मा, प्रकाश घिमिरे, हेमन्त बुढाथोकी, विशाल पहारी, विनोद न्यौपाने, रश्मी भट्ट, हिउँवाला गौतम, सन्दीपबाबु लोहनी, रोजी श्रेष्ठ, गंगा शर्मा, नवराज गिरि, बुद्धि सागर खनाल, प्रशंसा सुवेदी, कृतिका शर्मा र बाल कलाकार दिक्षिता अर्यालको अभिनय छ । रामप्रसाद रिजालको प्रस्तुति रहेको ‘काजी’मा असिम काफ्ले कार्यकारी निर्माता तथा नेहान रिजाल र विकासराज जोशी निर्माता रहेका छन् । यस फिल्मलाई श्रीराम बालाजी फिल्म्सले वितरण गर्दैछ ।
Discussion about this post