सडकमा जेनजीको रगत, बन्द कोठामा नेताको सत्ता खेल देखाइएको ‘म नेपाली हुँ’ गीत रिलिज

इटहरी/ पछिल्लो समय युवा पुस्ताले गरेको ‘जेनजी आन्दोलन’को मर्म र देशको वर्तमान राजनीतिक यथार्थलाई चित्रण गर्ने देशभक्तिपूर्ण गीत ‘म नेपाली हुँ, मेरो देश नेपाल’ सार्वजनिक भएको छ । शुक्रबार काठमाण्डौमा आयोजित एक भावुक कार्यक्रमका बीच जेनजी आन्दोलनमा ज्यान गुमाएका शहीदका परिवारहरूको विशेष उपस्थितिमा उक्त गीत सार्वजनिक गरिएको हो । बानेश्वर संसद भवन अगाडि श्रीमान् गुमाएकी उदयपुरकी अम्बिका विश्वकर्मा, शहीद बुद्धि बहादुर तामाङका बुबा कीर्तिपुरका विष्णु बहादुर तामाङ र आन्दोलनमा छोरा गुमाएकी पार्वती अधिकारीले संयुक्त रूपमा गीतको लोकार्पण गरेका थिए ।

वरिष्ठ सौन्दर्यविद् सुष्मा महराको शब्द तथा अभिनय रहेको यस गीतमा चर्चित गायक सत्यराज आचार्यले स्वर दिएका छन् । गीतमा वरिष्ठ सङ्गीतकार पुरुषोत्तम न्यौपानेको सङ्गीत र दीक्षित पौडेलको सङ्गीत संयोजन रहेको छ । शक्ति प्रज्वल घिमिरेको निर्देशनमा तयार भएको भिडियोले देशको राजनीतिक र सामाजिक ऐना देखाएको छ । एकातिर जेनजी पुस्ता सडकमा अधिकारका लागि रगत बगाइरहेका छन् भने, अर्कोतिर नेताहरू बन्द कोठाभित्र कुर्सीको खेलमा व्यस्त देखाइएको छ । सडकमा छाडिएको रगत लतपतिएको जुत्तालाई भिडियोमा सशक्त बिम्बको रूपमा प्रयोग गरिएको छ । भिडियोमा गीतकार सुष्मा महरा आफैँले शहीदकी आमाको जीवन्त भूमिका निर्वाह गर्दै सन्तान गुमाउनुको पीडा पस्किएकी छन् । हेर्नुस् भिडियो ।

राजेश घिमिरेको छायाङ्कन रहेको भिडियोलाई सतिश श्रेष्ठले सम्पादन गरेका हुन् । भिडियोका परिकल्पनाकार उज्वल जंग शाहले आन्दोलनमा ज्यान गुमाउने युवाहरूको सम्मानमा यो भिडियो निर्माण गरिएको बताए । उनले यसलाई एक ऐतिहासिक दस्तावेजको संज्ञा दिँदै शहीदका सपना र वर्तमान व्यवस्थाको यथार्थले आउँदो पुस्तालाई झक्झकाउने विश्वास व्यक्त गरे । त्यस्तै, गीतकार तथा कलाकार सुष्मा महराले आफू पनि एक जेनजीको आमा भएको नाताले आन्दोलनका घटनाक्रमले गहिरो चोट पुर्याएको बताइन् । “शान्तिपूर्ण परिवर्तन खोज्ने युवामाथि गोली बर्साइनु र ७२ जना शहीद हुनु सामान्य कुरा होइन,” उनले भनिन् ।

@parikalanewsofficial

युवाहरू काम खोज्दै विदेश पलायन भइरहँदा सरकार र राजनीतिक नेतृत्व भने सत्ताकै लुछाचुँडीमा लागेको भन्दै उनले आक्रोश पोखिन् । आन्दोलनको क्रममा २३ र २५ गतेका घटेका घटनाहरूले नै आफूलाई यो गीत लेख्न प्रेरित गरेको महराले प्रष्ट पारिन् । कार्यक्रमको सबैभन्दा भावुक क्षण तब बन्यो जब उपस्थित शहीद परिवारले आफ्ना पीडा पोखे । परिवारको सदस्य गुमाउँदाको विक्षिप्त अवस्थामा राज्यले मल्हम लगाउनुको साटो घोषणा गरेको सहयोगसमेत नदिएर आफूहरूलाई उपेक्षा गरेको गुनासो उनीहरूले गरे । विविधतामा एकता र देश सुधारका लागि सम्पूर्ण नेपाली एकजुट हुनुपर्ने सन्देश बोकेको यो गीतले दर्शक र स्रोताको मन छुने अपेक्षा गरिएको छ ।