‘पूर्ण बहादुरको सारङ्गी’का निर्देशक पौडेलले गरे फिल्म ‘सिन्दुरे जात्रा’को घोषणा

इटहरी/ नेपाली बक्स अफिसमा तहल्का पिट्न सफल र दर्शकको अपार माया बटुलेको फिल्म ‘पूर्ण बहादुरको सारङ्गी’ का क्याप्टेन अर्थात् ब्लकबस्टर निर्देशक सरोज पौडेल पुनः एक्सन-कटमा फर्किएका छन् । उनले दर्शकलाई अर्को मौलिक कथा पस्कने तयारीसहित आफ्नो नयाँ फिल्म ‘सिन्दुरे जात्रा’ निर्माणको औपचारिक घोषणा गरेका छन् ।

निर्देशक पौडेलले एक २६ सेकेन्ड लामो ‘टाइटल अनाउन्समेन्ट टिजर’ सार्वजनिक गर्दै फिल्मको घोषणा गरेका हुन् । सार्वजनिक टिजरले दर्शकमा ठूलो कौतूहल जगाउन सक्छ । भिडियोमा सिन्दुरे जात्राको मन्त्रोचारण जस्तो ध्वनि गुन्जिए पनि शब्दहरू अस्पष्ट र रहस्यमय राखिएका छन्, जसले फिल्मको जनरा र कथावस्तुप्रति थप जिज्ञासा बढाएको छ । हेर्नुस् टाइटल एनाउन्समेन्ट टिजर ।

फिल्मको कथा निर्देशक पौडेल स्वयंले तयार पारेका हुन् । नुवाकोटको प्रसिद्ध ऐतिहासिक पर्व ‘सिन्दुरे जात्रा’ सँग फिल्मको कथा कति नजिक छ वा यो नाम प्रतीकात्मक मात्र हो भन्ने विषयमा निर्माण पक्षले सस्पेन्स कायम राखेको छ । निर्देशक पौडेलले यसबारे अहिले नै मुख खोलेका छैनन् ।सारंगी फिल्म्सको ब्यानरमा निर्माण हुन लागेको यस फिल्ममा निर्माताको जिम्मेवारी प्रभाकार श्रेष्ठले सम्हालेका छन् ।

फिल्मको वितरणको जिम्मा आरआर फिल्मस्ले लिएको छ भने डिजिटल पार्टनरका रूपमा ओएसआर डिजिटल जोडिएको छ । कलाकारहरूमा भने निर्माण टिमले अहिले कुनै जानकारी सार्वजनिक गरेको छैन । फिल्ममा को–को कलाकार रहनेछन् र रिलिज कहिले हुनेछ भन्ने विषयमा केही समयपछि जानकारी गराइने निर्देशक पौडेलले बताए ।

@parikalanewsofficial

केही महिनाअघि पौडेलको लेखन तथा निर्देशनमा बनेको फिल्म ‘कोशेढुङ्गा’ प्रदर्शनमा आएको थियो । जेनजी आन्दोलनका कारण उत्पन्न असहज परिस्थितिले बक्स अफिसमा प्रभाव पारे पनि उक्त फिल्मले सामाजिक विषयवस्तु, मनोभावना र निर्देशन शैलीका कारण समीक्षक र दर्शकबाट राम्रो प्रतिक्रिया बटुलेको थियो । ‘पूर्ण बहादुरको सारङ्गी’ जस्तो ब्लकबस्टर फिल्म दिएपछि निर्देशक पौडेलको काँधमा दर्शकको अपेक्षा थपिएको छ ।