इटहरी/ चर्चित लोक गायिका सुनिता दुलाल बैवाहिक जीवनमा बाँधिने भएकी छन् । उनले हालै आफ्नो इन्गेजमेन्टको तस्बिर सामाजिक सञ्जालमार्फत सार्वजनिक गर्दै विवाहको औपचारिक जानकारी दिएकी हुन् । गायिका दुलालले यही मंसिर १३ गते शुक्रबार लगनगाँठो कस्ने पक्का भएको छ ।
उनले रुकुम पश्चिम स्थायी घर भएका राजेश केसी सँग विवाह गर्न लागेकी हुन् । दुलालका भावी श्रीमान केसी पेसाले इन्जिनियर तथा निर्माण व्यवसायी हुन् । उनी नेपाल विद्यार्थी संघ (नेविसंघ) का पूर्व केन्द्रीय सदस्य समेत हुन् । पारिवारिक स्रोतका अनुसार सुनिता र राजेश विगत ४ वर्षदेखि प्रेम सम्बन्धमा थिए ।
उनीहरूको विवाह समारोह काठमाडौँको मुलपानीस्थित ‘ग्रान्ड नर्लिङ होटल एण्ड रिसोर्ट’मा आयोजना गरिनेछ । विवाहमा दुवै पक्षका परिवारका सदस्य, नजिकका आफन्त र सीमित इष्टमित्रहरूको मात्र उपस्थिति रहने बताइएको छ । लामो समयदेखि सांगीतिक क्षेत्रमा सक्रिय दुलालको विवाहको खबरले उनका प्रशंसकहरू उत्साहित भएका छन् ।
Discussion about this post