हरर कमेडी फिल्म ‘फिरफिरे फिरिरी’ माघ ४ मा रिलिज, नयाँ पोस्टर सार्वजनिक

इटहरी/ माघ ४ गते प्रदर्शन मिति तय गर्दै हरर कमेडी जनरामा बनेको फिल्म ‘फिरफिरे फिरिरी’को नयाँ पोस्टर सार्वजनिक भएको छ । फिल्मले हास्य र डरको मिश्रणमार्फत दर्शकलाई भिन्न अनुभव दिन खोजेको छ । मनोजकुमार अधिकारीको निर्माणमा तयार भएको यो फिल्म बिन्दबासिनी क्रियसनको ब्यानरमा निर्माण भएको हो ।

‘नौ डाँडा पारी’ र ‘मंगलसुत्र’ जस्ता सफल फिल्महरु निर्माणसंगै अभिनय समेत गरेका अधिकारीले नेपाली फिल्ममा बढ्दो हरर कमेडी शैलीलाई आत्मसात् गर्दै ‘फिरफिरे फिरिरी’ निर्माण गरेका हुन् । यो फिल्मको सह-निर्मातामा नितिश पुन रहेका छन् ।

नविन भट्टको निर्देशनमा बनेको यो फिल्मले सन्दीप श्रेष्ठ र भावना उप्रेतीले कथा तयार गरेका हुन् । श्रेष्ठ र उप्रेतीले यहि ‘फिरफिरे फिरिरी’ लेखनबाट फिल्म लेखनमा डेब्यु गरेका हुन् । साथै, नविन भट्टले पनि यो फिल्मबाट डेब्यु गर्दैछन् । यो फिल्मको मुख्य भूमिकामा मनोजकुमार अधिकारी, सन्दीप श्रेष्ठ, भावना उप्रेती, रबिना केसी, पुष्प अवस्थी, र सुर्यमान लिम्बु लगायतको अभिनय रहेको छ ।

फिल्मको छायांकन जितु तामाङले गरेका छन् भने संगीत प्रशान्त सिवाकोटी र ब्याकग्राउन्ड म्युजिक एलिस कार्कीको रहेको छ । फिल्मलाई आरआर फिल्म्सले वितरण गर्नेछ भने डिजिटल अधिकार म्युजिक नेपालले लिएको छ । प्रविधि र कथाको संयोजनले ‘फिरफिरे फिरिरी’ लाई दर्शकमाझ लोकप्रिय बनाउने अपेक्षा गरिएको छ ।