कविताको भावसँगै जन्मियो ‘एक मुठी बादल’, आँचललाई जन्मदिनको सरप्राइज

इटहरी/ नेपाली फिल्म क्षेत्रमा पर्दा अगाडि मात्र होइन, पर्दा पछाडि अर्थात् प्राविधिक विधामा पनि महिलाहरूको शक्तिशाली उपस्थिति र सिर्जनात्मक नेतृत्व झल्काउने फिल्म ‘एक मुठी बादल: माई सेयर अफ स्काई’ को टिजर सार्वजनिक भएको छ । निर्माण पक्षले अभिनेत्री आँचल शर्माको जन्मदिनको विशेष अवसर पारेर उनलाई ‘सरप्राइज’ उपहारस्वरूप यो टिजर दर्शकमाझ ल्याएको हो ।

टिजरको सुरुवात निकै मिठासपूर्ण र नोस्टाल्जिक छ । आँचल शर्माकै आवाजमा गुन्जिने ‘पोम्पोईको फूल’ शीर्षकको कविताले दर्शकलाई सीधै कथाको गहिराइमा लैजान्छ । यो कविता फिल्मकी लेखिका तथा निर्देशक सहारा शर्माको धमिलो बाल्यकालसँग जोडिएको छ । सम्पादनको क्रममा फिल्मलाई एउटा बलियो भावनात्मक टेवा चाहिएको बेला, निर्देशक शर्मालाई आफ्नी हजुरआमाले सुनाउने ती बिर्सिसकेका हरफहरू एक्कासि याद आएका थिए । अन्ततः त्यही कविता फिल्मको प्राण बन्न पुग्यो । हेर्नुस् टिजर ।

@parikalanewsofficial

आफ्नो जन्मदिनमै फिल्मको पहिलो झलक बाहिरिनुलाई आँचलले एक सुन्दर संयोग मानेकी छन् । उनले ‘एक मुठी बादल’ लाई आफ्नो अभिनय यात्राकै सबैभन्दा ‘नितान्त विशेष’ प्रोजेक्ट भनेकी छन् । अहिलेसम्मका फिल्ममा अरुकै कथा र चरित्र बाँचेकी आँचलले यस फिल्मकी पात्र ‘माइली’ मा भने आफ्नै वास्तविक प्रतिबिम्ब भेटेकी छन् । आफ्नै भोगाइ र जीवनलाई ठूलो पर्दामा उतार्न पाउँदाको सन्तुष्टि शब्दमा वर्णन गर्न नसकिने उनको भनाइ छ ।

फिल्ममा आँचल शर्माको साथमा निशा शर्मा, उषा रजक, भिमा मैनाली, अस्मिता गौतम, शेखर चापागाईँ, मनिष निरौला, सहयोग अधिकारी, गौरव विष्ट र अविरलप्रताप अधिकारी लगायतका कलाकारहरूले जीवन्त अभिनय पस्केका छन् । यस फिल्मको सबैभन्दा विशिष्ट पक्ष भनेको निर्माणका अधिकांश महत्त्वपूर्ण विधामा महिलाहरूको कमान्ड हुनु हो । फिल्मको छायांकन लिन्ह डान गुयेन फानको रहेको छ भने प्रडक्सन डिजाइन यशस्वी सभरवाल, कला निर्देशन अग्रणी ठकुरी झा, भेषभूषा जानकी कडायत, मेकअप कीर्ति जोशी र प्रमुख सहायक निर्देशक मर्णा जेम्सका साथमा शर्मिला आले र मीरा खड्क रहेका छन् ।

@parikalanewsofficial

यद्यपि, फिल्मको सम्पादनको जिम्मेवारी भने गौरव मल्लिकले सम्हालेका छन् । गौँथली इन्टरटेनमेन्ट र मन प्रडक्सनको संयुक्त ब्यानरमा निर्माण भएको यस फिल्मका निर्माता अभिमन्यु दीक्षित हुन् भने कार्यकारी निर्माता निकुन श्रेष्ठ रहेका छन् । निर्माताको टोलीमा जर्मन फिल्ममेकर सारा फाजिलातका साथै सामीप्य राज तिमल्सेना र अनुप पौडेलको पनि सहकार्य रहेको छ ।