इटहरी/ प्रदर्शनको तयारी पूरा गरिसकेको अवस्थामा कानुनी अड्चनमा परेको नेपाली फिल्म ‘लालीबजार’ अन्ततः अदालतको पछिल्लो आदेशपछि रिलिजका लागि बाटो खुल्ला भएको छ । अब फिल्म यही शुक्रबार अर्थात् वैशाख २५ गतेदेखि देशभर प्रदर्शनमा आउने निश्चित भएको छ । अहिले यो फिल्मको अग्रिम टिकट बुकिङ समेत खुल्ला भइसकेको छ ।
काठमाडौँस्थित उच्च अदालत पाटनका न्यायाधीशद्वय खडानन्द तिवारी र नेत्रप्रसाद आचार्यको संयुक्त इजलासले यसअघि जारी गरिएको अल्पकालीन अन्तरिम आदेशलाई निरन्तरता दिन अस्वीकार गरेपछि ‘लालीबजार’ को प्रदर्शनमा देखिएको अवरोध हटेको हो । निर्माण कम्पनी षट्कोण आर्ट्सले अदालतको निर्णयसँगै फिल्म रिलिजको तयारी तीव्र बनाएको जनाएको छ ।
निर्माता म्याक्स दीपेश खत्रीले फिल्म कुनै पनि समुदायको भावना विपरीत नरहेको स्पष्ट पार्दै यसले आमा र छोरीबीचको सम्बन्ध र संघर्षलाई केन्द्रमा राखेको बताए । उनका अनुसार फिल्मले छोरीको भविष्यका लागि आमाले गर्ने त्याग र संघर्षको संवेदनशील कथा प्रस्तुत गर्छ ।
@parikalanewsofficial
‘लालीबजार’मा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, प्रेम पाण्डे, प्रदीप ढकाल, आशा पौडेल, गोविन्द सुनार, आभा आर्याल, तारा शर्मा, रमेश वादी, सरस्वती अधिकारी र जानकी कडायत लगायत कलाकारहरूको अभिनय देख्न पाइनेछ । कानुनी विवाद पार गर्दै प्रदर्शनमा आउन लागेको ‘लालीबजार’ अब दर्शकबीच कस्तो प्रतिक्रिया पाउँछ भन्ने प्रतीक्षा सुरु भएको छ ।
Discussion about this post