इटहरी/ पछिल्लो समय नेपाली फिल्म क्षेत्रमा एक्सन र कमेडी फिल्मको दबदबा छ । राम्रो र विशुद्ध ‘लभस्टोरी’ फिल्म भने न्यून छ । यही अभावलाई पूर्ति गर्ने लक्ष्यसहित नयाँ फिल्म ‘तिमी मेरो म तिम्रो’ निर्माण हुने भएको छ । शुक्रबार काठमाडौंमा आयोजित एक विशेष कार्यक्रमका बीच निर्देशक घनश्याम लामिछानेले आफ्नो नयाँ निर्देशकीय फिल्मको रूपमा यस फिल्मको औपचारिक घोषणा गरेका हुन् ।
उनले दर्शकको चाहना र नेपाली फिल्म उद्योगमा प्रेमकथाको न्यून संख्यालाई मध्यनजर गर्दै यो फिल्मलाई उत्कृष्ट रोमान्टिक जनरामा ढाल्ने प्रतिबद्धता व्यक्त गरे । यस फिल्मको सबैभन्दा ठूलो आकर्षण यसको ‘स्टारकास्ट’ हो, जहाँ पुराना र नयाँ पुस्ताको गजबको फ्युजन देख्न पाइनेछ । सदाबहार नायक भुवन केसी र चर्चित हास्य कलाकार जितु नेपाललाई एउटै पर्दामा देख्न पाउनु दर्शकका लागि नयाँ अनुभव हुनेछ ।
उनीहरूका साथमा अर्जुनजंग शाही, सन्तोष अधिकारी र रियान गिरीको मुख्य भूमिका रहनेछ । यसै फिल्म मार्फत प्रतिमा थापाले नव-नायिकाको रूपमा नेपाली फिल्म क्षेत्रमा पाइला टेक्दैछिन् । सन्तोष अधिकारी फिल्म्स र आस्प इन्टरटेनमेन्ट अस्ट्रेलियाको ब्यानरमा निर्माण हुन लागेको यस फिल्मको टिम निकै बलियो मानिएको छ । यसको कथा लेखन मनीष गौतमले गरेका हुन भने छायांकन नरेन्द्र मैनालीले गर्नेछन् ।
@parikalanewsofficial
फिल्ममा संगीत युग भुसालको रहनेछ । यस फिल्मको कार्यकारी निर्माता सन्तोष अधिकारी, सह-निर्माता राज श्रेष्ठ र आशिस थापा मगर, लाइन प्रोडुसर तेजविक्रम केसी रहेका छन् । नेपाल र अस्ट्रेलियाको निर्माण सहकार्य रहेको ‘तिमी मेरो म तिम्रो’ले नेपाली दर्शकको प्रेमकथाप्रतिको भोक मेटाउने र बक्स अफिसमा नयाँ तरंग ल्याउने अपेक्षा निर्माण पक्षले राखेको छ । यो फिल्म छिट्टै छायांकनमा जाने तयारीमा रहेको छ ।
Discussion about this post