‘राम नाम सत्य’को नयाँ गीतमा एक्सन स्टार विराज भट्ट खुशीसँग रोमान्टिक

इटहरी/ एक्सन भूमिकाबाट दर्शकको मनमा राज गर्दै आएका सुपरस्टार विराज भट्ट यसपटक भने फरक अवतारमा समेत दर्शकमाझ आउँदैछन् । बहुप्रतिक्षित फिल्म ‘राम नाम सत्य’ को नयाँ गीत ‘हुम्लाको लिमी’ सार्वजनिक भएसँगै विराज र नव–नायिका खुशी कार्कीको रोमान्टिक केमेस्ट्रीले यतिबेला चर्चा बटुलिरहेको छ । दैलेखका मनमोहक दृश्यहरूमा छायांकन गरिएको यस भिडियोमा विराज र खुशीको आकर्षक नृत्य देख्न सकिन्छ, जसलाई सियोन श्रेष्ठले कोरियोग्राफी गरेका हुन् ।

ओएसआर डिजिटलमार्फत सार्वजनिक भएको यो रोमान्टिक ट्रयाकमा एसडी योगी र गीताञ्जली थापा मगरको सुमधुर स्वर, मौसम अर्यालका शब्द र एसडी योगी स्वयंको संगीत रहेको छ । फिल्मको यसअघि रिलिज भएको अर्को गीत ‘धागोले बाटेको’ ले युट्युबमा ४० लाखभन्दा बढी भ्युज पाएर तहल्का मच्चाइरहेको छ । पहिलो गीतले पाएको अपार सफलताकै बीच निर्माण पक्षले दर्शकको उत्साहलाई कायम राख्न यो नयाँ सांगीतिक कोसेली पस्किएको हो । हेर्नुस् भिडियो ।

यो फिल्मको टिजरले समेत सामाजिक सञ्जालमा राम्रो हाइप बनाइसकेको छ । लभस्टोरी, सस्पेन्स, पारिवारिक सम्बन्ध र एक्सनको पूर्ण प्याकेज रहेको यो फिल्म माइकल इन्टरटेन्मेन्ट हाउसको प्रस्तुतिमा निर्माण भएको हो । फिल्मको कथा, पटकथा र निर्देशन माइकल चन्दले सम्हालेका छन् । फिल्ममा विराज र खुशीका साथै नेपाली फिल्म क्षेत्रका दिग्गज र लोकप्रिय अनुहारहरूको जमघट छ । सुनिल थापा, प्रशान्त ताम्राकार, सुशील श्रेष्ठ, सुपुष्पा भट्ट, दिव्या रायमाझी र आयुष सिंह ठकुरीलगायतका कलाकारहरूले यसमा अभिनय गरेका छन् ।

@parikalanewsofficial

यो फिल्मको निर्मातामा उपेन्द्र शाही र स्वेता बिमली रहेका छन् भने कार्यकारी निर्माता किशोर भट्ट, राजेन्द्र भट्ट र अर्जुन सुनार हुन् । मोती कार्की क्रियटिभ प्रोड्युसर र राजेन्द्र आचार्य लाइन प्रोड्युसरको रूपमा यो फिल्ममा रहेका छन् । मानकृष्ण महर्जनले छायांकन गरेको फिल्मको एक्सन श्री श्रेष्ठ र सम्पादन बन्दे प्रसादले गरेका हुन् । संगीत संयोजनको जिम्मा बाबुल गिरी, अर्जुन पोखरेल, एसडी योगी र ओम स्पार्कले लिएका छन् । उत्कृष्ट कथावस्तु, दमदार स्टारकास्ट र सुमधुर संगीतले सजिएको ‘राम नाम सत्य’ ले बक्स अफिसमा दर्शकको मन जित्दै सानदार व्यापार गर्ने विश्वास गरिएको छ ।