इटहरी/ प्रेम जति सुन्दर हुन्छ, बिछोड त्यति नै पीडादायी हुन्छ । त्यही बिछोडको पीडा र प्रेममा खटपट हुँदाको छटपटीलाई दुरुस्तै पर्दामा उतारेर फिल्म ‘डल्लेले इन्ट्री मार्यो’ को एउटा मर्मस्पर्शी भिडियो सार्वजनिक भएको छ । भर्खरै रिलिज भएको ‘मुटुमा हान्छन् छुरा’ बोलको गीतमा समावेश वियोगान्त दृश्यहरूले प्रेममा चोट खाएका जोकोहीको मन भक्कानिन्छ । गीतका शब्द, लय र सङ्गीतले सिधै मुटुमा प्रहार गर्छन् । नेपाली साङ्गीतिक क्षेत्रका पुराना र कालजयी वियोगान्त गीतहरूको झल्को दिने यस गीतले श्रोता तथा दर्शकलाई मन्त्रमुग्ध बनाउँछ ।
सुन्दा जति भावुक बनाउँछ, हेर्दा त्यति नै आँसु रसाउने यो गीतमा गायक कर्ण राज गिरीकै शब्द, सङ्गीत र जादुमयी स्वर सुन्न सकिन्छ । यही गहिरो मर्म बोकेको गीत, आउँदो चैत २७ गतेबाट देशभरका फिल्म हलहरूमा प्रदर्शनमा आउन लागेको प्रतिक्षित फिल्म ‘डल्ले ले इन्ट्री मार्यो’को पहिलो सार्वजनिक गीत हो । पहिलो गीतबाटै दर्शकको मनमा गहिरो छाप छोड्दै गइरहेको यो फिल्मलाई लिएर दर्शकमा अहिलेदेखि नै उत्सुकता बढ्न सुरु गरेको छ । हेर्नुस् गीत ।
कार्यविनायक फिल्म्स प्रालि र उषा फिल्म्स प्रोडक्सनको संयुक्त प्रस्तुति रहेको यस फिल्ममा सागर लम्साल र रोशनी खड्काको मुख्य भूमिका रहेको छ । उनीहरूका साथमा दिग्गज कलाकारहरू रबिन्द्र झा, रमेश बुढाथोकी, हेमन्त बुढाथोकी, विशाल पहारी, धुर्व कोइराला, लक्ष्मीनाथ तिमल्सिना, ओशिन भट्टराई, आशा पौडेल, रामहरि खड्का लगायतको दमदार अभिनय देख्न पाइनेछ । फिल्ममा काजोल गिरी, कंगना गिरी र रोनिश खड्का बाल कलाकारका रूपमा देखिएका छन् । सावित्रा चिलुवाल, आशिक बस्नेत, आदर्श बस्नेत, निर्मला बस्नेत र सरिता पुरी गिरीले यस फिल्मलाई निर्माण गरेका हुन् ।
@parikalanewsofficial
फिल्मको कथा उमेश कुमार बस्नेतले लेखेका हुन् भने पटकथा तथा संवाद लक्ष्मण सुवेदीको रहेको छ । श्याम तामाङको उत्कृष्ट छायाँकन रहेको फिल्मलाई गौतम राज खड्काले सम्पादन गरेका हुन् भने केशव राज भट्टले कोरियोग्राफी सम्हालेका छन् । फिल्मका अन्य गीतहरूमा बाबुल गिरी र रिमेश कुमार थापाको पनि सङ्गीत तथा डम्बर बिकेलको शब्द सुन्न सकिनेछ । साहिल खानले ट्रेलर तथा टिजर तयार पारेको यस फिल्मको डिजिटल राइट्स ओएसआर डिजिटलले लिएको छ भने नेशनल सिने ग्रुप नेपालले यसलाई देशभर वितरण गर्दैछ ।
Discussion about this post