अनुष्काको मिस नेपाल विजेतादेखि मिस वर्ल्ड सम्मको यात्रा, अहिले संसद बन्दा मिस वर्ल्ड टिमको बधाई

इटहरी/ सन् २०१९ की ‘मिस नेपाल वर्ल्ड’ अनुष्का श्रेष्ठ राष्ट्रिय राजनीतिमा औपचारिक रूपमा प्रवेश गरेकी छन् । ‘मिस वर्ल्ड’ जस्तो गरिमामय अन्तर्राष्ट्रिय मञ्चमा ‘ब्युटी विथ अ पर्पज’ अवार्ड जितेर इतिहास रचेकी श्रेष्ठ अब संघीय संसद्को सदस्यका रूपमा नीति निर्माणको तहमा देखिने भएकी हुन् । नेपालको पछिल्लो राजनीतिक विकासक्रमसँगै श्रेष्ठलाई राष्ट्रिय स्वतन्त्र पार्टीले समानुपातिक निर्वाचन प्रणालीमार्फत प्रतिनिधिसभा सदस्यमा निर्वाचित गरेको छ ।

प्रभावशाली सार्वजनिक व्यक्तित्व र युवा आवाजहरूलाई शासन प्रणालीमा जोड्ने प्रयासस्वरूप उनलाई यो जिम्मेवारी दिइएको हो । अनुष्काको यो नयाँ राजनीतिक यात्रालाई मिस वर्ल्डको आधिकारिक वेबसाइट ले विशेष स्थान दिएको छ । साथै, मिस वर्ल्डको आधिकारिक फेसबुक पेजमा समेत उनको यो उपलब्धिलाई निकै महत्त्वका साथ पोस्ट गरिएको छ । लन्डनमा आयोजित ६९औँ मिस वर्ल्ड प्रतियोगितामा शीर्ष १२ भित्र पर्न सफल अनुष्काले ‘मल्टिमिडिया च्यालेन्ज’ र ‘ब्युटी विथ अ पर्पज’ दुवै जितेर नेपालको नाम चम्काएकी थिइन् ।

@parikalanewsofficial

सांसदको पदभार सम्हाल्न लाग्दा अनुष्काले देशप्रतिको आफ्नो प्रतिबद्धता पुनः दोहोर्‍याएकी छन् । सामाजिक सञ्जालमा उनले लेखेकी छन्,”नेपालको आवश्यकता इमानदार, असल र बलियो शासन, सुरक्षा, न्याय, सम्मान, समानता र समृद्धि हो । म इमानदारिता र दृढताका साथ देशको सेवा गर्ने प्रतिबद्धता व्यक्त गर्दछु ।” आगामी चुनौतीहरूबारे आफू सचेत रहेको र सदाचारलाई मुख्य प्राथमिकतामा राख्ने उनले बताएकी छन् ।

मिस वर्ल्ड संगठनकी अध्यक्ष जुलिया मोर्ले र सम्पूर्ण मिस वर्ल्ड परिवारले अनुष्कालाई यो ठूलो सफलताका लागि बधाई दिएका छन् । सामाजिक सञ्जाल र मिस नेपाल समुदायमा उनको यो कदमलाई ‘वकालतबाट कार्य’ र ‘आवाजबाट नीति निर्माण’ सम्मको एक स्वाभाविक र प्रेरणादायी यात्राका रूपमा व्याख्या गरिएको छ । व्यवसायी, अभियन्ता र अब जनप्रतिनिधिका रूपमा अनुष्काको बहुआयामिक भूमिकाले नेपालको भविष्य निर्माणमा युवाहरूको प्रभावकारी सहभागिताको प्रतिनिधित्व गर्ने अपेक्षा गरिएको छ ।