फिल्म ‘मालती मंगले’को पहिलो गीत सार्वजनिक

इटहरी/ विशुद्ध ग्रामीण प्रेमकथा र निस्वार्थ मायाको सुगन्ध बोकेको फिल्म ‘मालती मंगले’ मार्फत सुगम सङ्गीतका धरोहर रामकृष्ण ढकाल अब निर्माताका रूपमा पर्दामा आउँदैछन् । आगामी नयाँ वर्षको वैशाख २५ गते अर्थात् मे ८ बाट प्रदर्शनको तयारीमा रहेको यस फिल्मको शीर्ष गीत ‘सुनैको सपनी’ भर्खरै एक विशेष कार्यक्रमका बीच सार्वजनिक गरिएको छ ।

रानी फिल्म्सको ब्यानरमा निर्मित यस फिल्मको गीत सार्वजनिक कार्यक्रमको सबैभन्दा सुन्दर क्षण त्यतिबेला देखियो, जब निर्माता तथा गायक ढकालले सङ्गीतकार उज्वल सागरलाई आफ्नै हस्ताक्षरसहितको गितार उपहारस्वरूप प्रदान गरे । दृष्टिमा समस्या भए पनि जादुमयी धुन सिर्जना गर्ने सागरले उक्त सम्मान ग्रहण गर्दै यस टिमसँगको सहकार्यले आफू निकै उत्साहित भएको सुनाए । हेर्नुस् भिडियो ।

‘सुनैको सपनी’ गीतमा आनन्द अधिकारीका मार्मिक शब्द, उज्वल सागरको सङ्गीत र उदयराज पौडेलको एरेन्ज रहेको छ । यसमा स्वयं ढकाल र लोकप्रिय गायिका रचना रिमालले स्वर दिएका छन् । फिल्मको नाम सुन्नेबित्तिकै धेरैको दिमागमा राष्ट्रकवि माधवप्रसाद घिमिरेको चर्चित गीतिनाटक आउन सक्छ । तर, कार्यक्रममा ढकालले यो भ्रमलाई चिर्दै भने, “यो राष्ट्रकविको नाटकमा आधारित होइन । हाम्रै वरपर रहेको तर त्यो दृष्टिकोणबाट नहेरिएको एउटा सामाजिक प्रेमकथा हो यो ।”

त्यस्तै, गीतकार अधिकारीले गीतको भाव प्रस्ट्याउँदै गरिबले पनि कसरी निस्वार्थ प्रेम गर्न सक्छन् र प्रेममा कुनै स्वार्थ हुँदैन भन्ने कुरा आफूले शब्दमार्फत बुझाउन खोजेको बताए । आफ्नो स्वर रेकर्ड गराउन निर्माता ढकालले लामो समय पर्खिएको थाहा पाउँदा गायिका रचना रिमालले आश्चर्य व्यक्त गर्दै कृतज्ञता प्रकट गरिन् । यता, अभिनेत्री वर्षा राउतले रामकृष्ण ढकालजस्तो हस्तीले बनाएको फिल्ममा जोडिन पाउनुलाई आफ्नो लागि ठूलो उपलब्धि मानिन् । आफ्नो पहिलो निर्देशकीय फिल्ममै विश्वास गरेकोमा निर्देशक प्रकु पाण्डेयले ढकाल र कार्यकारी निर्माता सागर ज्ञवालीप्रति आभार प्रकट गरे ।

@parikalanewsofficial

अर्को फिल्मको छायाङ्कनमा व्यस्त रहेका कारण मुख्य अभिनेता विजय बराल भने कार्यक्रममा उपस्थित हुन सकेका थिएनन् । फिल्ममा विजय बराल, वर्षा राउत र मेक्सम गौडेल प्रमुख भूमिकामा छन् भने कथा तथा निर्देशन प्रकु पाण्डेको रहेको छ । मालती मंगलेको पटकथा तथा संवाद भने संयोग गुरागाईँले तयार गरेका हुन् । महेश पौडेलले छायांकन गरेको फिल्मको सम्पादन र रङ्ग संयोजन रोमी मोजेज र कृष्ण भण्डारीले गरेका हुन् । यसअघि सार्वजनिक पोस्टरमा देखिएको विजय र वर्षाको प्रेमिल मुद्रालाई यस गीतले थप जीवन्त बनाएको छ । फिल्ममा नरिन थापा, प्रकाश घिमिरे, सरिता गिरीलगायतका अन्य थुप्रै कलाकारहरूको पनि अभिनय रहेको छ ।