विष्णु माझीको तीज गीत करोड क्लबमा: २४ घण्टे किर्तिमानी, तोड्न सकेन सकम्बरीको रेकर्ड

इटहरी/ गायिका विष्णु माझीको तीज गीत ‘आइन आमा यो तीजमा’ युट्युबमा नौ दिनमै एक करोडभन्दा बढी पटक हेरिएको छ । यो गीत सोमबार साँझ ५ बजेसम्ममा एक करोड भ्युज पार गरेको हो । सुन्दरमणि अधिकारीले लेखेको र संगीतबद्ध गरेको यस गीतले युट्युबमा सार्वजनिक भएको २४ घण्टाभित्रै सबैभन्दा धेरै पटक हेरिने नेपाली गीतको कीर्तिमान बनाएको थियो । उक्त गीतलाई एकै दिनमा १५ लाख पटक हेरिएको थियो ।

विष्णु माझीको यस गीतले तीज पर्वको समयावधिमा दर्शकको ठूलो ध्यानाकर्षण गरेको थियो । प्रारम्भिक दिनहरूमा नै यस गीतले अर्को नयाँ रेकर्ड बनाउने अनुमान गरिएको थियो । विशेष गरी, गीतले एक सातामा एक करोड भ्युज पार गर्ने अपेक्षा गरिएको थियो । तर, अपेक्षा भन्दा केही ढिलो गरी गीतले नौ दिनमा यो उपलब्धि हासिल गरेको हो ।

यसअघि एक सातामा सबैभन्दा छिटो एक करोड भ्युज पाउने गीत भने प्रकाश सपुतको ‘सकम्बरी’ हो । जसको धेरै चर्चा र विवाद उत्पन्न भएको थियो । ‘सकम्बरी’ गीतले एक साताभित्र १ करोड भ्युजको रेकर्ड कायम गरेको थियो । ‘आइन आमा यो तीजमा’ गीतको म्युजिक भिडियोमा आशिष अविरलको एरेन्ज, मौसम हिमालीको कोरियोग्राफी र ‘चरी जेलैमा’की चर्चित मोडल ललिता पौडेलको अभिनय रहेको छ । यो गीत विष्णु माझीको तीज गीतहरूमा नयाँ आयाम थप्न सफल भएको छ ।