प्रधानमन्त्रीको सपथ लिने पूर्वसन्ध्यामा बालेनले ल्याए नयाँ र्‍याप गीत ‘जय महाकाली’

इटहरी/ आजै सांसदको सपथ लिएका र राष्ट्रिय स्वतन्त्र पार्टीको संसदीय दलको नेता बनेका बालेन शाहले भोलि चैत १३ गते नेपालको प्रधानमन्त्रीका रूपमा सपथ ग्रहण गर्दैछन् । यही ऐतिहासिक अवसर पारेर उनले आफ्नो युट्युब च्यानलमार्फत ‘जय महाकाली’ बोलको नयाँ गीत सार्वजनिक गरेका छन् ।
राजनीतिक र सांगीतिक यात्रालाई सँगसँगै अगाडि बढाइरहेका बालेनका लागि यो समय निकै विशेष बनेको छ । आजै रास्वपा संसदीय दलको नेता चयन भएका उनी भोलि देशको कार्यकारी प्रमुख बन्दैछन् ।

यही खुसीयाली र नयाँ जिम्मेवारीको उत्साहस्वरूप उनले यो गीत बजारमा ल्याएका हुन् । आफ्नै शब्द, संगीत र स्वरमा सजिएको यस गीतमा बालेनको चिरपरिचित र्‍याप शैली सुन्न सकिन्छ । गीतमा उनले जोसिला शब्दहरू प्रयोग गर्दै गाएका छन्,”जय महाकाली, आयो गर्खाली । विश्व जित्छिन् यसपाली, डराउँदैन यसपाली । जय महाकाली, आयो गोर्खाली । हात-हातमा राँको बाली फैलिन्छ यो नेपाली ।” गीतको भिडियोमा उनका चुनावी अभियानका विभिन्न क्लिप्सहरूलाई आकर्षक रूपमा समेटिएको छ ।

यस गीत मार्फत उनले आम नागरिकलाई ‘यो पाली घर-घरमा खुशी पुग्नेछ’ भन्ने बलियो प्रण समेत प्रकट गरेका छन् । गीतले सार्वजनिक भएको छोटो समयमै दर्शकको अपार माया पाइरहेको छ । यो समाचार तयार पार्दासम्म युट्युबमा भिडियो सार्वजनिक भएको जम्मा ५३ मिनेटमै ९५ हजारभन्दा बढीले हेरिसकेका छन् भने भ्युज बढ्ने रफ्तार निकै तीव्र छ । लाइक पनि भ्युजकै रफ्तारमा छ । गीतमा किरण बरालले बाँसुरीको धुन भरेका छन् । नेपसेकले रेकर्ड गरेको यस गीतको संगीत निर्माण फोर्सिल/क्रोनिक बिजले गरेका हुन् भने भिडियो सम्पादनको जिम्मा बिकेश मगरले सम्हालेका छन् ।