‘जुबा’ मार्फत स्टार अभिनेता सौगात मल्लसँग देखिँदै इटहरीका रंगकर्मी डेभिड विष्ट

इटहरी/ सुनसरीको इटहरीलाई लामो समय आफ्नो रङ्गमञ्चीय कर्मथलो बनाएका कलाकार डेभिड बिष्ट अब नेपाली फिल्म क्षेत्रमा बलियो उपस्थितीको तयारीमा छन् । उनी निर्देशक प्रकाश कर्णको आगामी बहुप्रतिक्षित फिल्म ‘जुबा’मा निकै महत्त्वपूर्ण भूमिकाका लागि छनौट भएका छन् । यतिबेला उनी काठमाडौंमा सोही फिल्मको ‘वर्कसप’मा व्यस्त छन् । अडिसन पार गर्दै ‘जुबा’मा छनोट भएका डेभिड आफ्नो भूमिकालाई लिएर निकै उत्साहित छन् ।

फिल्ममा आफ्नो चरित्र मुख्य पात्र सरह नै प्रभावशाली रहेको उनले बताएका छन् । डेभिडको अभिनय क्षमताबाट फिल्मका निर्देशक प्रकाश कर्ण पनि निकै प्रभावित बनेका छन् । डेभिडको कामको प्रशंसा गर्दै निर्देशक कर्णले भने, ‘आफू र आफ्नो टिमले जे क्यारेक्टर सोचेका थियौं, त्यो क्यारेक्टरलाई डेभिडले अझै बढी राम्रो र जीवन्त बनाएका छन् ।’

इटहरीस्थित ‘कलालय’मा रहेर विगत ७ वर्षदेखि निरन्तर रंगमञ्चमा साधनारत डेभिड नेपाली रंगमञ्चका एक अब्बल कलाकार हुन् । अभिनयको गहिराई बुझेका उनले आफ्नो कला यात्रालाई ‘मलाई रङमञ्च मेरो पाठशाला, अभिनय मेरो अभ्यास हो भन्ने लाग्छ ।’ भनेर प्रस्त्याउँछन् । सत्रु, रिफन्ड, बहुलकाजीको सपना र योगमाया लगायतका चर्चित १० वटा नाटकहरूमा उनले सशक्त अभिनय गरिसकेका छन् । यस्तै ‘तिनतारा’, ‘बलिदान’ र ‘विमान’ जस्ता फिल्महरूमा समेत काम गरिसकेका उनले ज्याक्यस, पाँच हजार र गाढा १७ जस्ता छोटो फिल्ममा अभिनय गरेका छन् ।

@parikalanewsofficial

यस्तै विभिन्न वेब शृङ्खलाका साथै डायनामिक ब्यान्डको म्युजिक भिडियो ‘भावनाका रंगहरु’ मा समेत उनले अभिनय गरेका छन् । अस्त्र फिल्म्सको ब्यानरमा निर्माण हुन लागेको यस फिल्ममा डेभिड बिष्टसँगै नेपाली फिल्मका स्टार अभिनेता सौगात मल्ल मुख्य भूमिकामा देखिनेछन् । यसै फिल्ममार्फत नयाँ अनुहार सोफी धरेलले डेब्यु गर्दैछिन् भने अभिनेता सुधन पोखरेल पनि महत्त्वपूर्ण भूमिकामा रहनेछन् । निर्माण टिमका अनुसार फिल्म यतिबेला प्रि-प्रोडक्सनको अन्तिम चरणमा पुगेको छ र केही दिनमै छायांकन सुरु गरिने तयारी भइरहेको छ ।

फिल्मको कथा र विषयवस्तु पूर्ण रूपमा सार्वजनिक नगरिए पनि, सार्वजनिक पोस्टर र क्यारेक्टर लुकका आधारमा ‘जुबा’ पुरानो समयको परिवेशमा आधारित प्रेम, संघर्ष र सामाजिक कथामा केन्द्रित हुने अनुमान गरिएको छ । यस फिल्मको कथा तथा स्क्रिनप्लेमा निर्देशक प्रकाश कर्ण स्वयंले काम गरेका छन् भने उनलाई लेखनमा वर्षा पौडेलले साथ दिएकी छन् । नयाँ शैली र प्रस्तुतीका साथ दर्शकमाझ ल्याउन लागिएको यो फिल्मको रिलिज मिति भने तय हुन बाँकी छ । छायांकन सुरु भएसँगै अन्य प्राविधिक विवरणहरू सार्वजनिक गरिने निर्माण पक्षले जनाएको छ । नेपाली फिल्म क्षेत्रमा ‘जुबा’लाई एक प्रतीक्षित फिल्मको रूपमा हेरिएको छ ।