सांसदले शपथ लिएपछि अभिनेत्री ऋचा शर्माको प्रश्न, ‘के हामी नागरिकले पनि शपथ लिएका छौं ?’

इटहरी/ नयाँ निर्वाचित सांसदहरूले पद तथा गोपनीयताको शपथ लिएसँगै अभिनेत्री ऋचा शर्माले आम नागरिकको दायित्व र जिम्मेवारीमाथि गम्भीर प्रश्न उठाएकी छन् । उनले देश बनाउने जिम्मेवारी नेताहरूको मात्र नभई सम्पूर्ण नागरिकको पनि भएको भन्दै परिवर्तनको सुरुवात आफैंबाट गर्न आह्वान गरेकी हुन् । नयाँ सांसदहरूले देश बदल्ने संकल्पसहित शपथ ग्रहण गरेलगत्तै अभिनेत्री शर्माले आफ्नो सामाजिक सञ्जालमा एक अर्थपूर्ण स्ट्याटस लेख्दै नागरिकको चेतनामाथि जोड दिएकी हुन् ।

उनले लेखेकी छन्, “आज नयाँ सांसदहरूले शपथ लिए देश बदल्ने जिम्मेवारीका साथ । तर साँचो प्रश्न यो हो– के हामी नागरिकले पनि शपथ लिएका छौं ?” नियम तोड्ने, आफ्नो जिम्मेवारीबाट पन्छिने र अरूबाट मात्र अपेक्षा राख्ने प्रवृत्तिले देश नबन्ने शर्माको भनाइ छ । देश विकासका लागि हरेक व्यक्तिले आफ्नो दायित्व बुझ्नुपर्ने स्पष्ट पार्दै उनले अगाडि लेखेकी छन्, “देश तब बन्छ जब हरेक नागरिक सचेत, अनुशासित र जिम्मेवार हुन्छ ।”

आफ्नो स्टाटसको अन्त्यमा उनले भावी पुस्तालाई हस्तान्तरण गर्ने देश आजै र हामी आफैंले बनाउनुपर्ने बताएकी छन् । “अब परिवर्तनको समय हामीबाट सुरु,” भन्दै उनले सबै नेपालीलाई अनुशासित र जिम्मेवार नागरिक बन्न प्रेरित गरेकी छन् ।
समसामयिक र सामाजिक विषयमा खुलेर आफ्नो विचार राख्दै आएकी अभिनेत्री शर्माको यो भनाइलाई यतिबेला धेरैले समर्थन जनाएका छन् । नेतालाई मात्र गाली गर्ने तर आफ्नो कर्तव्य भुल्ने आम प्रवृत्तितिर लक्षित यो स्ट्याटसले सामाजिक सञ्जालमा राम्रो चर्चा पाउन सुरु गरेको छ ।