इटहरी/ रिलिजको संघारमा आएको फिल्म ‘रावायण’को बहुप्रतीक्षित आइटम गीत ‘करेजा निकरी’ शुक्रबार सार्वजनिक गरिएको छ । यो गीतको केहि अंश यसअघि सार्वजनिक टिजर र ट्रेलरमा समेत समावेश गरिएको थियो । त्यसैले पनि यो गीतको प्रतीक्षा थियो । यस गीतमा सोनु कक्कर र समीर चौरासियाको सुमधुर आवाज रहेको छ । यो गीतमा प्रदीप श्रीवास्तवले शब्द कोरेका छन् र रेवन आरती सिंहले सङ्गीत भरेका छन् ।
भोजपुरी भाषामा रहेको यो गीतको भिडियोमा पल शाह, प्रकाश शाह, कैलाश रावल र निकिता चण्डकको उत्कृष्ट नृत्य देख्न पाइन्छ । विक्रम स्वारको कोरियोग्राफी र सुनिता श्रेष्ठको कष्ट्युम डिजाइनले भिडियोमा विशेष आकर्षण थपेको छ ।गीतमा निकिता चण्डकको ग्ल्यामरस अवतार र प्रकाश शाहको तराई भेगको पहिरनले दर्शकलाई तान्न सफल भएको छ । हेर्नुस् भिडियो ।
सार्वजनिक गीतको भिडियोमा अभिनेता पल शाहको अप्रत्याशित प्रवेशले पनि थप उत्सुकता सिर्जना गरेको छ । यसरी हेर्दा फिल्मको कथासंग यो गीतले धेरै मात्रामा अर्थ राख्छ । यो फिल्म ‘रावायण’ सुदर्शन थापा प्रोडक्शन र पूजा शर्मा प्रोडक्शनको संयुक्त ब्यानरमा निर्माण गरिएको फिल्म हो, जसको निर्माता पूजा शर्मा हुन् ।
सुशन पाठक कार्यकारी निर्माता रहेको यस फिल्ममा पल शाह, पूजा शर्मा, प्रियङ्का कार्की र निकिता चण्डक लगायत कलाकारहरूको अभिनय रहेको छ । फिल्मको हालसम्म सार्वजनिक पोस्टर, टिजर, गीतहरु र ट्रेलरका कारण यो फिल्म ‘रावायण’ प्रतिक्षित बनेको छ । फिल्मको कथा सुदर्शन थापाले लेखेका हुन् भने शिवम अधिकारीको लेखन र सौरभ लामाको छायाङ्कन रहेको छ । आरआर फिल्मसले फिल्मको वितरण गर्नेछ भने डिजिटल प्लेटफर्मका रूपमा ओएसआर डिजिटल रहेको छ ।
Discussion about this post