मैथिली म्युजिक भिडियोमा देखियो टिकटक स्टार धिरु भाइ र मोडल आयुषाको रोमान्टिक अवतार

इटहरी/ शान्त कोशीको किनार, मनमोहक प्राकृतिक सौन्दर्य र त्यसमाथि प्रेमिल जोडीको रोमान्टिक दृश्य । पछिल्लो समय सामाजिक सञ्जालमा तहल्का मच्चाइरहेका टिकटक स्टार धिरु भाइ र व्यस्त मोडल आयुषा विक यस्तै एक सुन्दर दृश्यसहित दर्शकमाझ आएका छन् । यी दुईको गज्जबको अनस्क्रिन केमेस्ट्री समेटिएको नयाँ मैथिली म्युजिक भिडियो ‘अहा स दिल लगेली’ शनिबारदेखि सार्वजनिक भएको छ ।

प्रेम भावले भरिएको यस गीतमा प्रेमी र प्रेमिकाबीचका अविस्मरणीय पलहरूलाई जीवन्त रूपमा प्रस्तुत गरिएको छ । ‘कला म्युजिक क्रिएसन’को युट्युब च्यानलमार्फत रिलिज गरिएको भिडियोमा कोशी नदी र यस वरपरका मनमोहक दृश्यहरू कैद गरिएका छन् । प्राकृतिक दृश्य र यी दुई कलाकारको रोमान्टिक किस्साले दर्शकलाई गीतको अन्त्यसम्म बाँधेर राख्न सक्छ भन्दा फरक नपर्ला । हेर्नुस् भिडियो ।

भिडियोमा मुख्य आकर्षण बनेका धिरु भाइ टिकटकमा निकै चर्चित नाम हो, जसलाई २५ लाखभन्दा बढी टिकटक प्रयोगकर्ताले फलो गरेका छन् । त्यस्तै, भिडियोकी मुख्य मोडल आयुषा विक पनि पछिल्लो समय मैथिली म्युजिक इन्डस्ट्रीमा निकै ‘डिमान्डेड’ छिन् । सामाजिक सञ्जालमा हजारौं फलोअर्सको साथ पाएकी आयुषा अचेल दैनिकजसो स्टेज कार्यक्रम र म्युजिक भिडियो छायांकनमा व्यस्त रहने गरेकी छिन् ।

@parikalanewsofficial

यी दुई चर्चित अनुहारको सहकार्यले गीतको भिडियो आकर्षक बनेको छ । गायक राकेश पासवानको सुमधुर स्वर र उनको आफ्नै शब्द रहेको यस गीतलाई बादल राजले संगीतबद्ध गरेका हुन् । भिडियोको निर्देशन एमडी मनिर खानले गरेका हुन्, जसले अडियो र कोरसमा पनि साथ दिएका छन् । धिरज मण्डलको निर्माण रहेको यस भिडियोको सम्पूर्ण व्यवस्थापन भने कलाकार धिरु भाइ आफैंले सम्हालेका छन् ।