इटहरी/ पछिल्लो समय मोडल तथा कलाकार सागर लम्साल (बले) माथि लागेको बलात्कारको आरोपले मनोरञ्जन क्षेत्र र सामाजिक सञ्जाल तरंगित भइरहेका बेला अभिनेत्री स्वस्तिमा खड्काले मौनता तोडेर बोल्ने पीडितको पक्षमा उभिन अपिल गरेकी छन् । खड्काले सामाजिक सञ्जालमार्फत एक सन्देश जारी गर्दै अन्यायविरुद्ध बोल्नेको साहसलाई सम्मान गर्न र उनीहरूलाई प्रश्नको साटो आडभरोसा दिन समाजलाई आग्रह गरेकी हुन् ।
घटना भएको लामो समयपछि मात्रै किन उजुरी दिएको वा सार्वजनिक गरेको भनी समाजले गर्ने लाञ्छनायुक्त प्रश्नहरूप्रति असन्तुष्टि व्यक्त गर्दै उनले पीडितको मानसिक सङ्घर्षलाई बुझ्न अनुरोध गरेकी छन् । “हामी कति सजिलै प्रश्न गर्छौँ, ‘एक वर्षसम्म किन नबोलेको ? यतिका समय किन चुप बसेको ?’ तर हामी यो सोच्दैनौँ कि त्यो मौनता तोडेर हिम्मत जुटाउन उनलाई कति ठूलो मानसिक सङ्घर्ष गर्नुपर्यो होला,” स्वस्तिमाले आफ्नो स्ट्याटसमा लेखेकी छन् ।
हिंसाविरुद्ध आवाज उठाउनु कमजोरी नभई डर र सामाजिक त्रासलाई जितेर निकालिएको ‘साहसको गर्जन’ भएको उनको भनाइ छ । आफूमाथि भएको अन्यायविरुद्ध बोलिरहेकाहरूलाई समाजले प्रश्नले थिच्नुको साटो साथ दिने बानी बसाल्नुपर्नेमा उनले जोड दिएकी छन् । भोलिका दिनमा यस्तै घटना आफ्नै परिवारमा पर्दा कस्तो महसुस होला भनी समाजको ध्यानाकर्षण गराउँदै उनले लेखेकी छन्, “हामीले जस्तो समाज बनाउँछौँ, भोलि हामी आफैँले त्यही समाजमा बाँच्नुपर्छ । यो कुरा मनन गरौँ, पीडितलाई थप पीडा दिने होइन, न्यायको लागि दह्रो साथ दिने प्रण गरौँ ।”
कानुनी प्रक्रिया र न्याय निरूपणको काम अदालतले गर्ने भए पनि आम नागरिकले मानवता देखाउनुपर्ने स्वस्तिमाको निष्कर्ष छ । उनले आफ्नो सन्देशको अन्त्यमा भनेकी छन्, “रह्यो कुरा न्यायको, त्यो त कानुनले हेर्छ । तर, मानवता हामीले देखाउनुपर्छ ।”
Discussion about this post