करोडौं भ्युजसहित लोकप्रिय गीत ‘गुन भुल्यौ’को दोश्रो सिक्वेल ‘साइला दाइ’ सार्वजनिक

इटहरी/ नेपाली फिल्म र सांगीतिक क्षेत्रमा डेढ दशकदेखि अनवरत रूपमा सक्रिय नाम हो- सारिका घिमिरे । एक दर्जनभन्दा बढी फिल्म र तीन दर्जन हाराहारी म्युजिक भिडियोमा आफ्नो अब्बल अभिनय कौशल पस्किसकेकी सारिका पछिल्लो समय गायिकाको रूपमा थप उचाइ चुम्दैछिन् । ‘करोड क्लब’मा पर्न सफल उनको सांगीतिक यात्रामा अब अर्को इँटा थपिएको छ – ‘गुन भुल्यौ-२ साइला दाइ’ मार्फत ।

यसअघि दर्शक तथा श्रोताले अत्याधिक रुचाएको ‘गुन भुल्यौ पित्तलको सुन पायौं होला’ को अपार सफलतालाई निरन्तरता दिँदै उनले यो नयाँ सिक्वेल दर्शकमाझ ल्याएको हो । सारिकाकै आधिकारिक युट्युब च्यानलबाट सार्वजनिक गरिएको यस गीतमा शब्द, संगीत र स्वर स्वयं उनकै रहेको छ । गीतले मायामा पाएको धोका, प्रेमविछोडको पीडा र आफूले लगाएको गुन भुलेर जाने निष्ठुरी मायालुप्रतिको गुनासोलाई मार्मिक रूपमा उठान गरेको छ । हेर्नुस् भिडियो ।

गीतको अडियो जति उत्कृष्ट छ, भिडियो पनि उत्तिकै आकर्षक बनेको छ । भिडियोमा गायिका सारिका घिमिरेका साथमा सौर्य तिरुवा र जेरी भण्डारीको जीवन्त अभिनय देख्न सकिन्छ । भिडियोलाई निर्देशन केशवराज भट्टले गरेका छन् भने छायांकन करण चैसिर, सम्पादन मनोज कार्की र मिक्सिङ तथा मास्टरिङ मनोज परियारले गरेका छन् ।

@parikalanewsofficial

सार्वजनिक भएको छोटो समयमै यस गीतले दर्शक र श्रोताको राम्रो साथ पाइरहेको छ । अहिले सामाजिक सञ्जाल, विशेषगरी टिकटक र इन्स्टाग्राम रिल्समा समेत यस गीतमाथि थुप्रै भिडियोहरू बनिरहेका छन् । पहिलो भागले जस्तै ‘साइला दाइ’ ले पनि सबैको माया पाउनेमा गायिका घिमिरे निकै आशावादी छिन् । नायिकाबाट गायिकाका रूपमा समेत आफ्नो बलियो पहिचान बनाएकी सारिकाको यो नयाँ सिर्जनाले सफलताको नयाँ रेकर्ड राख्ने संकेत गरिसकेको छ ।