सुशान्तको अवस्था गम्भीर, परिवारले गरे भण्डारीलाई कारबाहीको माग

इटहरी / शुक्रबार बिहान सवारी दुर्घटनामा परेका युवा कमेडियन सुशान्त बस्यालको अवस्था गम्भीर छ । मध्यपुर ठिमी अस्पतालमा उपचार गराइरहेका उनको अवस्था गम्भीर रहेको चिकित्सकले जनाएका छन् । स्रोतका अनुसार बस्यालको भेन्टिलेटरमा राखेर उपचार भइरहेको छ । उनलाई टाउकोमा गहिरो चोट लागेको छ । अहिले उनी अचेत नै छन् ।

बस्याल कमेडी च्याम्पियनको दोस्रो सिजनका प्रतिस्पर्धी हुन भने प्रसारण भइरहेको तेस्रो सिजनमा उनी प्रोडक्सन टीममा काम गरिरहेका छन् । कमेडी च्याम्पियनको जारी सिजनका २ प्रतिस्पर्धी पनि घाइते छन् ।

आइतबार बिहान ३ बजे उनीहरु नगरकोटबाट फर्किदै गर्दा रोकिएको उनीहरू चढेको गाडिले टिप्परलाई ठक्कर दिएको थियो । कारमा ६ जना सवार थिए ।

दुर्घटनामा परेका अन्य तीनजना भने खतरामुक्त छन् । कमेडी च्याम्पियनका निर्देशक विशाल भण्डारी र पूजन अधिकारी सामान्य उपचारपछि प्रहरी हिरासतमा छन्। मदिरासेवन गरेर गाडी चलाएको आरोपमा उनीहरूलाई प्रहरीले नियन्त्रणमा लिएको हो । गम्भीर घाइते सुशान्तका परिवारले भण्डारी र अधिकारीलाई कारबाहीको माग गरेका छन् ।