‘कुमारी’को ट्रेलर हेर्न र केहरलाई सुन्न भृकुटीमण्डपमा उर्लियो जनसागर, नेपाली फिल्ममा नयाँ इतिहास

इटहरी/ नेपाली फिल्मको प्रचार शैलीमा एउटा नयाँ आयाम थपिएको छ । बन्द कोठा र सीमित पत्रकार सम्मेलनको घेरा तोड्दै, फिल्म ‘कुमारी’ले खुल्ला आकाशमुनि १० हजारभन्दा बढी दर्शकको साक्षीमा आफ्नो ट्रेलर सार्वजनिक गरेर नेपाली फिल्म इतिहासमै एउटा फरक र ऐतिहासिक घटना रचेको छ । यही माघ २३ गते रिलिज हुने वर्षकै बहुप्रतीक्षित यस प्रेम कथानक फिल्मको ट्रेलर रिलिज कार्यक्रम काठमाडौँको भृकुटीमण्डपमा ‘कन्सर्ट’को झल्को दिने गरी भव्यताका साथ सम्पन्न भयो ।

ठूलो पर्दामा पहिलो पटक देखिन लागेका अबिषेक खड्का र आकृति राजभण्डारी ले डेब्युमै हजारौँ दर्शकको प्रत्यक्ष हुटिङ र तालीको स्वाद चाखे । डेब्यु अभिनेता अबिषेक खड्का सार्वजनीक ट्रेलरमा उनी एक संवेदनशील, रिसाहा तर परिस्थितिले थिचिएको प्रेमीका रूपमा देखिएका छन् । उनको अभिनयमा संवादभन्दा बढी आँखाको भाव र मौनताको शक्ति झल्किएको छ ।

यस्तै आकृति राजभण्डारीले पनि यही फिल्मबाट ठूलो पर्दामा डेब्यु गर्दैछिन् । सार्वजनिक ट्रेलरमा उनी केवल प्रेमिका होइनन्, आत्मसम्मान र मौन विद्रोहको प्रतीक हुन् । उनको आँखामा देखिने डर र निर्णयको कठोरताले उनलाई सशक्त नारी पात्रका रूपमा उभ्याएको छ । ट्रेलर सार्वजनिक भएसँगै दर्शक र समीक्षकहरूले यी नयाँ अनुहारले नेपाली फिल्ममा स्थापित पुराना हस्तीहरूलाई कडा टक्कर दिने अनुमान गर्न थालेका छन् । हेर्नुस् ट्रेलर ।

ट्रेलर रिलिज कार्यक्रममा उपस्थित लभस्टोरीका बादशाह आर्यन सिग्देल र ‘शाम्बाला’ फेम्ड थिन्ले ल्हामो ले पनि नयाँ जोडीको खुलेर प्रशंसा गरे । ‘आइ एम सरी’, ‘नोभेम्बर रेन’ र ‘क्लासिक’ जस्ता सफल लभस्टोरी फिल्म दिएका निर्देशक दिनेश राउत बीचमा ‘प्रसाद’, ‘प्रकाश’ र ‘पुजार सार्की’ मार्फत सामाजिक मुद्दामा केन्द्रित थिए । तर, ‘कुमारी’ मार्फत उनी आफ्नो ‘सिग्नेचर जनरा’ अर्थात् विशुद्ध प्रेम कथामा फर्किएका छन् ।

निर्देशक राउतले भने, “खुला आकाशमुनि हजारौँ दर्शकलाई साक्षी राखेर ट्रेलर रिलिज गर्नु मेरो सपना थियो । यो उत्साह हलसम्म पुग्नेमा विश्वस्त छु ।” सार्वजनिक ट्रेलरले सामान्य प्रेम कथा मात्र नभई पारिवारिक सम्बन्ध र मनोवैज्ञानिक अन्तर्द्वन्द्वलाई उजागर गरेको छ । शाहिल खानको सम्पादन र सुसन प्रजापतिको छायाङ्कनले सार्वजनीक ट्रेलर हेर्दा फिल्मलाई ‘हेर्ने मात्र होइन, महसुस गर्ने’ बनाएका छन् । ट्रेलर युट्युबको ट्रेन्डिङ मा उक्लिनुले पनि यसको व्यापकतालाई पुष्टि गर्छ ।

@parikalanewsofficial

विनिश इन्टरटेन्मेन्ट ब्यानरमा निर्माण भएको यो फिल्मका निर्माता महेन्द्र अधिकारी हुन भने फिल्मका लेखक विकास सुवेदी हुन् । फिल्मका गीतहरूमा केहर सिं लिम्बु र उनको ब्यान्ड स्वर र संगीत छ । ट्रेलर रिलिज कार्यक्रम केवल औपचारिक मात्र थिएन । चर्चित ब्यान्डहरू ‘इस्त्रीज’, ‘त्रिजा प्रदान एन्ड द टुकुचा’ र पार्श्व गायक केहर सिं लिम्बु को लाइभ प्रस्तुतिले भृकुटीमण्डप गुञ्जायमान भयो ।

यही अवसरमा फिल्मको चर्चित गीत ‘डोको बुन्ने’ ले ५० लाख भ्युज पार गरेको खुसीयालीमा केक काटेर सेलिब्रेसन गरियो । यसअघि नै हिट भइसकेका ‘कता छौ मेरो फूल’ र ‘तिमी बिना’ जस्ता गीतले फिल्मको हाइपलाई थप उचाइमा पुर्‍याइसकेका छन् । सार्वजनिक ट्रेलरले एउटा गम्भीर प्रश्न छोडेको छ- “प्रेम जित्नु ठूलो कुरा हो कि प्रेममा इमानदार हुनु ?” नयाँ युगको सुरुवात गर्ने सङ्केत देखाएको ‘कुमारी’ ले बक्स अफिसमा कस्तो आँधी ल्याउने छ, त्यो भने माघ २३ गते नै थाहा हुनेछ । तर, सुरुवात भने धमाकेदार भइसकेको छ ।