पूर्ण बहादुरको सारङ्गीका निर्देशक र कलाकार एकसाथ, ‘सिन्दुरे जात्रा’मा जोडिए विजय र अञ्जना

इटहरी/ नेपाली फिल्मको बक्स अफिसमा ५० करोड माथिको व्यापार गर्दै ऐतिहासिक रेकर्ड कायम गरेको फिल्म ‘पूर्णबहादुरको सारङ्गी’ को टिम फेरि एकपटक दर्शकको मन जित्न तयार भएको छ । ब्लकबस्टर निर्देशक सरोज पौडेलले आफ्नो नयाँ र बहुप्रतिक्षित प्रोजेक्ट ‘सिन्दुरे जात्रा’ को औपचारिक रूपमा सुरुवात गरेका छन् । यही ‘लक्की टिम’ को पुनरागमनले अहिले फिल्म वृतमा नयाँ तरंग ल्याएको छ ।सरस्वती पूजाको शुभ अवसर पारेर निर्माण पक्षले फिल्मका मुख्य दुई कलाकार अनुबन्ध गरेको छ । निर्देशक पौडेलले ‘सिन्दुरे जात्रा’ का लागि विजय बराल र अञ्जना बराइली लाई नै मुख्य भूमिकामा चयन गरेका छन् ।

यसअघि यो जोडीले ‘पूर्णबहादुरको सारङ्गी’ मा श्रीमान्-श्रीमतीको भूमिकामा जीवन्त अभिनय गरेका थिए । विशेषगरी विजय बरालको अभिनयले उनलाई करियरकै ‘टर्निङ पोइन्ट’ मा पुर्‍यायो भने गन्धर्व परिवारको त्यो मार्मिक कथाले सारा नेपालीलाई रुवायो । अहिले सोही सफल सहकार्यलाई निर्देशक पौडेलले ‘सिन्दुरे जात्रा’ मार्फत निरन्तरता दिएका हुन् । दुई हिट कलाकारलाई दोहोर्‍याउनुको कारण खुलाउँदै निर्देशक पौडेलले यो निर्णय बजारको प्रभाव नभई कथाको आवश्यकता भएको बताए ।

“विजय र अञ्जना अहिलेका रुचाइएका कलाकार हुन् । तर, हामीले बजारले रुचाएका कलाकार भनेर लिएका हैनौँ,” निर्देशक पौडेलले प्रष्ट पारे, “कथाले नै उहाँहरूलाई मागेपछि अनुबन्ध गराएका हौँ । यदि फिल्म राम्रो बनाउने हो भने कथा सुहाउँदो चरित्र बनाउनु र त्यसलाई न्याय गर्ने कलाकार लिनुको विकल्प हामी सामु छैन ।” उनले फिल्मको गुणस्तर र कास्टिङमा कुनै पनि सम्झौता नगर्ने प्रतिबद्धता समेत जनाएका छन् । अन्य कलाकारहरू पनि क्रमशः पात्रको आवश्यकता अनुसार अनुबन्ध गर्दै लगिने निर्माण पक्षले जनाएको छ ।

@parikalanewsofficial

सारंगी फिल्म्सको प्रस्तुतिमा बन्न लागेको यस फिल्मको कथा स्वयं निर्देशक सरोज पौडेलले नै लेखेका हुन् भने पटकथा तथा संवादमा सबिन अधिकारी र वसन्त न्यौपाने रहेका छन् । फिल्मको वितरणको जिम्मा आरआर फिल्मसले लिएको छ । अहिले कलाकार छनोटको चरणमा रहेको निर्माण टिमले छायांकन र प्रदर्शन मिति भने गोप्य राखेको छ । यद्यपि, ५० करोड क्लबको यो टिम एकसाथ आउँदा ‘सिन्दुरे जात्रा’ ले बक्स अफिसमा अर्को धमाका मच्चाउने अपेक्षा अहिलेदेखि नै गर्न थालिएको छ ।