स्कुलको प्राङ्गणबाट गरियो ‘रोल नं. १’ आगामी जेठ १५ गते रिलिज गर्ने घोषणा

इटहरी/ फिल्मको घोषणा वा रिलिज मिति सार्वजनिक गर्न सामान्यतया पाँचतारे होटल वा प्रेसमिटको तामझाम रोज्ने गरिन्छ । तर, फिल्म ‘रोल नं. १’ को निर्माण टिमले भने एक पृथक र अर्थपूर्ण शैली अपनाएको छ । विद्याकी देवी सरस्वतीको पूजाको शुभ अवसर पारेर फिल्मले आफ्नो प्रदर्शन मिति २०८३ साल जेठ १५ गते गणतन्त्र दिवसका लागि तय गरेको छ ।

फिल्मको कथा नै ‘बाल मनोविज्ञान’ र शिक्षासँग जोडिएको हुनाले निर्माण पक्षले यसको घोषणा पनि शिक्षासँग विशेष रहेको दिनमा विद्यालयमै पुगेर गरेको हो । फिल्मका प्रमुख बाल-कलाकारहरू अध्ययनरत विद्यालय ‘पाथिक ज्ञान निकेतन’ मा पुगेर निर्माण टिम, शिक्षक र विद्यार्थीहरूकै बीचमा प्रदर्शन मिति सार्वजनिक गरिएको थियो । यो शैलीले फिल्मको मर्मलाई अझ प्रष्ट पारेको छ ।

जोन योञ्जनको निर्देशनमा तयार भइरहेको यो फिल्म पूर्ण रूपमा बालबालिकाको मनोविज्ञानमा केन्द्रित छ । फिल्मको छायांकन हिमाली जिल्ला म्याग्दीका रमणीय ग्रामीण भेगहरूमा गरिएको छ । महेश दवाडीको लेखन रहेको यस फिल्मले शिक्षा क्षेत्रको गम्भीर पाटो उजागर गर्ने अपेक्षा छ । पोस्टरमा कक्षाकोठामा हात उठाएर हाजिरी जनाउँदै गरेको बालकको दृश्यले पहिले नै चर्चा बटुलिसकेको छ ।

@parikalanewsofficial

फिल्ममा स्थापित कलाकारहरू र बाल-प्रतिभाहरूको बेजोड संगम देख्न पाइनेछ । यसमा मुकुन भुसाल, सुशांक मैनाली, रेणु योगी, सिर्जना अधिकारी मुख्य भूमिकामा छन भने बाल कलाकारको भूमिकामा निर्भिक रेग्मी, रिन्चेन लामा, संयम कटुवाल, सिजल श्रेष्ठ रहेका छन् ।

विनोद पौडेल र गुञ्जन गिरी निर्माता रहेको फिल्मको कार्यकारी निर्माता रमेश चौलागाईं हुन् । शिवराम श्रेष्ठको छायांकन, प्रशान्त शिवाकोटीको संगीत, मदन घिमिरेको सम्पादन यो फिल्ममा रहेको छ । निर्माता विनोद पौडेलले दिएको जानकारी अनुसार सेभेन सिज सिनेमाको प्रस्तुति रहेको यो फिल्म नेपालसँगै विदेशमा पनि एकसाथ प्रदर्शन हुनेछ । रिच इन्टरटेन्मेन्ट र जे एम सिनेमाले फिल्मको वितरण जिम्मा लिएका छन् ।